އެމެރިކާގެ އަސްކަރިއްޔާގައި ބޭނުންކުރާ ހަނގުރާމަމަތީ ޖެޓުތައް އުފުލާ އެންމެ ބިޔަ މަނަވަރުތައް ކަމަށްވާ ޔޫއެސްއެސް އަބްރަހަމް ލިންކަންއާއި، ޔޫއެސްއެސް ޖޯޖް ވޮޝިންޓަންވެސް، އީރާނަށް ހަމަލާދޭން ޖަމާކުރާ ލަޝްކަރުގައި ހިމެނެއެވެ.
އެމެރިކާއިން މެދުއިރުމައްޗަށާއި، ޔޫރަޕަށް ޖަމާކުރަމުންދާ ހަނގުރާމައިގެ ބިޔަ ލަޝްކަރަކީ އެމެރިކާގެ ތާރީޚްގައިވެސް ހަނގުރާމައަކަށް އެއްނުކުރާ ވަރުގެ ބިޔަ އަދި ވަރުގަދަ ލަޝްކަރެއް ކަމަށް ވެއެވެ.
މި ލަޝްކަރުގައި ބޮންއަޅާ އެންމެ ބޮޑެތި މަތިންދާ ބޯޓުތަކާއި، މިސައިލް ހަމަލާދޭ ޖެޓުތަކާއި، މިސައިލް އުދުއްސާލާ މަނަވަރުތަކާއި، ނިއުކްލިއަރ ސަބްމެރިންއާއި، އެނޫންވެސް އެންމެ ޒަމާނީ ހަތިޔާރު ހިމެނެއެވެ. އެތައްހާސް ސިފައިންވެސް ހިމެނެއެވެ.
މި ހަތިޔާރުތައް ޖަމާކުރަމުން ގެންދަނީ އީރާނަށް ހަމަލާ ދެވޭ ވަރާ ގާތަށް ކަމަށް ވެއެވެ. އޭގެ ތެރޭގައި، ސަރަހައްދުގައި ހުރި އެމެރިކާގެ ބޭސްތަކާއި، ކަނޑުގެ ސަރަހައްދުވެސް ހިމެނެއެވެ
އީރާނުން އެންމެފަހުން ދިން އިންޒާރުގައި އެމެރިކާއަށް އަންގާފައިވަނީ، އީރާނުގެ ކަނޑުގެ ސަރަހައްދުގެ ތެރެއަށް އެމެރިކާގެ އެއްވެސް މަނަވަރެއް ވަދެއްޖެނަމަ ވަގުތުން ފައްތާލާނޭ ކަމަށެވެ. އަބްރަހަމް ލިންކަންވެސް ފައްތާލާނޭ ކަމަށާއި، އެކަމުގެ ގާބިލްކަން އީރާނު ކަނޑުގެ ސިފައިންގެ އެބަހުރި ކަމަށްވެސް ބުނެ އިންޒާރު ކޮށްފައި ވެއެވެ.
އެމެރިކާގެ ބިޔަ މަނަވަރުތަކަށް ހަމަލާ ދޭނީ ހައިޕަރސޮނިކް ބެލިސްޓިކް މިސައިލުން ކަމަށްވެސް ބުނެފައި ވެއެވެ. ހައިޕަރސޮނިކް ބެލިސްޓިކް މިސައިލަކީ މިސައިލުން ދިފާއުވުމަށް އެމެރިކާއިން ބޭނުންކުރާ އެންމެ ޒަމާނީ އައްޑަނަތަކަށްވެސް ގޮއްވާލެވޭ ވަރަށް ވުރެ ބާރަށް ދަތުރުކުރާ މިސައިލްތަކެއްކަން އިސްރާއީލަށް ދިން ވަރުގަދަ ހަމަލާތަކުންވެސް ވަނީ ސާބިތުވެފައެވެ.
އީރާނު ސިފައިން ބޭނުންކުރާ ފައްތާހް-1 އަދި ފައްތާހް-2 ހައިޕަރސޮނިކް ބެލިސްޓިކް މިސައިލަކީ އަޑަށްވުރެ އެތައްގުނަ ބާރަށް އުދުހޭ މިސައިލެވެ.
އަނެއްކޮޅުން، ކަނޑުގެ ލޮނުގަނޑާ ވަރަށް ގާތުން އެތައްހާސް ކިލޯމީޓަރު ދުރުމިނަށް އުދުމުގެ ގާބިލްކަން ލިބިފައިވާ އަބޫ މަހްދީ އަދި ނޫރު އެންޓި ޝިޕް މިސައިލަކީ ރާޑަރަށްވެސް އެރުން ނާދިރު މިސައިލްތަކެއް ކަމަށް ވެއެވެ. މިކަމުގެ ބިރު އެމެރިކާގެ އަސްކަރިއްޔާގައި އުފެދިފައި ވެއެވެ.
އީރާނުގެ ފަރާތުން ކުރިމަތިވެދާނެ މި ނުރައްކަލުން ސަލާމަތްވާން އެމެރިކާއިން މެދުއިރުމަތީގައި ހުރި އެމެރިކާގެ އަސްކަރީ ބޭސްތައް ވަށައިގެން އައްޑަނަތައް މިހާރު ގާއިމްކުރަމުން ގެންދާއިރު، އީރާނުން އަތުވެދާނެ މިސައިލްތަކުން އިސްރާއީލު ސަލާމަތް ކުރަންވެސް އިސްރާއީލުގެ އައްސޭރިފަށުގައާއި، އެހެން ހިސާބުތަކުގައިވެސް އައްޑަނަތައް ގާއިމްކުރަމުންދާ ކަމަށް ޚަބަރުތަކުން އެނގެއެވެ.
އެކަމަކު ކަނޑުމަގު އެމެރިކާގެ މަނަވަރުތަކަށް ނުރައްކާވާނެ އެހެން ސަބަބެއް އެބައޮތެވެ.
ބުނެވޭގޮތުގައި، ދުނިޔޭގެ އެންމެ ނުރައްކާތެރި ކަނޑުގައި އަޅާ މައިން (ކަނޑުބޮން) ގެންގުޅެނީ އީރާނުންނެވެ. އެއީ، އީރާނުން އަމިއްލައަށް ތަރައްގީކޮށް އުފައްދާ މައިންތަކެކެވެ. އެއީ، އެމް އޭ52 މައިނެވެ. މިއީ ކަނޑުގެ ލޮނުގަނޑަށްވުރެ އަޑީގައި އަޅައި ގޮއްވާލައިގެން ހަމަލާދޭ މައިނެވެ.
އީރާނުން އުފައްދާ މި މައިންތަކަކީ މާސިންގާ ބޮޑެތި ބިޔަ މަނަވަރުތައްވެސް ގޮއްވާލުމުގެ ގާބިލްކަން ލިބިފައިވާ މައިންތަކެއް ކަމަށް ވެއެވެ.
އެންމެ ނުރައްކާތެރި ކަމަކީ، އަދި އެމެރިކާއާއި، އެމެރިކާގެ ބައިވެރިންވެސް އެންމެ ކަންބޮޑުވާ ކަމަކީ، އީރާނުން އުފައްދާ މި މައިންތަކަކީ ނޮން-މެގްނެޓިކް މައިންތަކަށް ވުމެވެ. ނޮން-މެގްނެޓިކް ވީމާ އެފަދަ މައިންތައް އަޅާފައިވާ ތަންތަން ދެނެގަނެ ނައްތާލުމަކީވެސް ފަސޭހަ ކަމެއް ނޫނެވެ.
އީރާނުން ހަނގުރާމައަށް ވަމުންދާ ތައްޔާރީތަކުގައި އެންމެ ވަރުގަދައަށް ހަތިޔާރާއި ސިފައިން ޖަމާކޮށް ތައްޔާރު ކޮށްފައިވަނީ ހޮރްމޫޒް ކަނޑޮއޮޅިއެވެ. އެމެރިކާ އަދި އެމެރިކާގެ ބައިވެރިންވެސް ކަނޑުމަގުން އީރާނާ ގާތްވާން ބޭނުންކުރާނީ މި ކަނޑުއޮޅިކަން ގައިމުވެފައި ވެއެވެ.
ހޮރްމޫޒް ކަނޑުއޮޅީގެ އެންމެ ފުޅާ ސަރަހައްދުގެ ފުޅާމިނަކީ 55 ކިލޯމީޓަރެވެ. މާނައަކީ، ދުޝްމަނުންގެ މަނަވަރުތައް ގޮއްވާލަން މައިންތައް އަޅާލުމަކީ އީރާނަށް ވަރަށް ފަސޭހައިން ކުރެވޭނޭ ކަމެއް ކަމެވެ.
