2025 ވަނަ އަހަރުގެ ތެރޭގައި އެމެރިކާ ސިފައިން ކުއްލިއަކަށް ޔަމަނަށް ބޮންއަޅަން ފެށީ، ޔަމަނުގައި ވެރިކަންކުރާ ހޫޘީންގެ ފަރާތުން ކެނޑިނޭޅި އިސްރާއީލަށް ހަމަލާ ދެމުން ގެންދިއުމާއި، އެކަމުގެ ނުރައްކާ އިސްރާއީލަށް ބޮޑުވެގެންނެވެ. އެމެރިކާއިން ބޮންއަޅާ އެންމެ ވަރުގަދަ މަތިންދާ ބޯޓުތަކާއި، ބިންގަނޑު ތޮރުފާ ހަތިޔާރުން ޔަމަނުގެ އެތަން މިތަނަށް ބޮންއަޅައި، އެތައްސަތޭކަ އާންމުން މަރައި ޔަމަނަށް ބޮޑެތި ގެއްލުންތައް ދިނެވެ.
ނަމަވެސް، ކުއްލިއަކަށް ފެނިގެންދިޔައީ އިސްރާއީލަށް އަންގާވެސް ނުލައި، އެމެރިކާއިން ހޫޘީންނާއެކު ޑީލެއް ހަދައި ޔަމަނަށް ހަމަލާދިނުން ހުއްޓާލިތަނެވެ. އެ ޑީލަކީ ރަތްކަނޑުގައި ހަރަކާތްތެރިވާ އެމެރިކާގެ މަނަވަރުތަކަށް ހަމަލާ ނުދޭމަތިން ހެދި ޑީލެކެވެ.
މިޑީލް ހެދުމުން އިސްރާއީލު ވަރަށް ރުޅިވެސް އައެވެ. އެކަމާ އިހުތިޖާޖުކުރި ތަންވެސް ފެނިގެންދިޔައެވެ.
އެމެރިކާއަށް އެ ޑީލް ހަދަން މަޖުބޫރުވީ، އެމެރިކާއިން ރަތްކަނޑަށް ފޮނުވި އަސްކަރީ އެތައް މަނަވަރަކަށް ހޫޘީންގެ ވަރުގަދަ ހަމަލާތައް އަމާޒުވެ ބޮޑެތި އެތައް ގެއްލުންތައް ލިބޭން ފެށުމުންނެވެ. އެމެރިކާއިން އެ ސަރަހައްދަށް ފޮނުވި ހަނގުރާމަމަތީ މަތިންދާ ބޯޓު އުފުލާ ބިޔަ މަނަވަރު ކުއްލިއަކަށް ސަރަހައްދު ދޫކޮށް ގޮސް، މެދުއިރުމަތީގެ ގައުމަކަށް މަރާމާތަށް އެހެލުމުން ހޫޘީން ދިން ގެއްލުންތައް ވަރަށް ސާފުކޮށް އެނގިގެންދިޔައެވެ.
ހޫޘީންގެ ހަމަލާތަކުގައި އެމެރިކާ ސިފައިންގެ ބައެއް ކުދި މަނަވަރުތައް ފައްތާލި ކަމަށް ހޫޘީން ބުނެއެވެ. ނަމަވެސް އެމެރިކާ އަސްކަރިއްޔާއިން އެކަމާ އެއްބަހެއް ނުވެއެވެ.
ޑީލް ހެދިފަހުން، އެމެރިކާއިން ހޫޘީން ހުއްޓުވާކަށް އެއްވެސް ކަމެއް ނުކުރެއެވެ. ހޫޘީންގެ އެތައް ހަމަލާތަކެއް އިސްރާއީލަށް ފަހުންވެސް އަމާޒުވެ ބޮޑެތި ގެއްލުންތައް ދީފައި ވެއެވެ.
އެފަހަރު އިސްރާއީލު އެކަނިކޮށްލާފައި އެމެރިކާ ސިފައިން ދިއުމުން އިސްރާއީލު އޮތީ ވަރަށް ބޮޑަށް ހިތްހަމަ ނުޖެހިފައެވެ. ހޫޘީން ހަދާނެގޮތެއް އިސްރާއީލަށް ހަދަން ދޫކޮށްލުމުންނެވެ.
އެހެންވެ، އިސްރާއީލުގެ އަސްކަރީ ޖެނެރަލުންނާއި، ޒަޔަނިސްޓު ވެރިން މިހާރު ތިބީ ޝައްކެއްގައި ކަމަށް، މީޑިއާ ރިޕޯޓްތައް ބުނަމުން ގޮސްފައި ވެއެވެ. އެއީ، އިސްރާއީލާ ގުޅިގެން އީރާނަށް ހަމަލާދޭން ފެށުމަށްފަހު އެމެރިކާގެ މަސްލަހަތުތަކަށް ގެއްލުންތައް ލިބޭން ފެށުމުން އިސްރާއީލު އެކަނި ދޫކޮށްލާފައި އެމެރިކާ ސިފައިން ގޮސްދާނެތީއެވެ.
އޭރުން އީރާނުން އިސްރާއީލުގެ ދުވަސް ދުއްވާލާނޭކަން އިސްރާއީލަށް ރަނގަޅަށް އެނގެއެވެ. އެމެރިކާގެ އެހީއާއި ނުލައި އީރާނަށް ދިގުލައިގެންދާ ހަމަލާތަކެއް ނުދެވޭނޭ ކަމާއި، އިސްރާއީލު ބޭނުންވެގެން އުޅޭ ކަންތައް ހާސިލް ނުވާނޭކަންވެސް އެމީހުނަށް އެނގެއެވެ.
2025 ވަނަ އަހަރުގެ ޖޫންމަހު އީރާނާއި އިސްރާއީލާ ދެމެދު ކުރި 12 ދުވަހުގެ ހަނގުރާމައިގައި އިސްރާއީލުން ހަތިޔާރު ހުސްވެ، އީރާނުން އޮއްސަމުންދިޔަ ބެލިސްޓިކް މިސައިލާއި ހަމަލާދޭ ޑްރޯންގެ ވާރޭގައި އިސްރާއީލުގެ ވަސްވެސް ދުނިޔެއިން ފޮހެވިގެން ހިނގައިދާނެކަން ކަށަވަރުވެ، އެމެރިކާ ހަނގުރާމައިގެ ތެރެއަށް ވަދެގަތީ އިސްރާއީލު ރޮއި ހޭރިގަތުމުންނެވެ. އޭރު އީރާނު އޮތީ އިސްރާއީލަށް އިންތިހާއަށް ބޮޑެތި ގެއްލުންތައް ދީފައެވެ.
އީރާނަށް ހަމަލާދޭން އިސްރާއީލާއި އެމެރިކާއަށްވެސް ރަތްކަނޑު މުހިންމެވެ. ރަތްކަނޑަށް ވަންނަން މަޖުބޫރު ވާނެއެވެ. އެމެރިކާއަށް ޔަމަނުގެ ހޫޘީންނާއެކު ޑީލް ހަދަން މަޖުބޫރުވީ ހޫޘީންގެ ނުރައްކާ ބޮޑުވެގެންނެވެ.
ހޫޘީ އަސްކަރިއްޔާ އަންސާރުﷲއަކީ ލުބުނާނުގެ ހިޒްބުﷲއަށް ވުރެންވެސް އެތައް ގޮތަކުން ބާރުގަދަ އަސްކަރިއްޔާއެކެވެ. އަންސާރުﷲގައި އެއްގަމާއި ކަނޑާއި ވައިގެ ސިފައިންގެ ލަޝްކަރުތައް އޮވެއެވެ. އެމީހުންގެ އަތުގައި އެންމެ ޒަމާތީ ހަތިޔާރާއި ޑްރޯން ފައުޖެއްވެސް އޮވެއެވެ. ހައިޕަރސޮނިކް ބެލިސްޓިކް މިސައިލް ގެންގުޅެއެވެ. ކަނޑުގައި މައިން އަޅައިގެން ހަމަލާދިނުމުގެ ގާބިލްކަންވެސް ލިބިގެން ވެއެވެ.
އީރާނަށް ހަމަލާ ދިނުމަށް އެމެރިކާއިން ވަނީ މެދުއިރުމައްޗަށް ކަނޑުގެ މާސިންގާ ބިޔަ ލަޝްކަރެއް ޖަމާކޮށްފައެވެ. އެ ލަޝްކަރުގައި، އެމެރިކާގެ އަސްކަރިއްޔާގައި ބޭނުންކުރާ އެންމެ ބޮޑެތި ހަނގުރާމަމަތީ މަތިންދާ ބޯޓުތައް އުފުލާ މަނަވަރުތައްވެސް ހިމެނެއެވެ.
ޔަމަނުގެ ހޫޘީ އަސްކަރިއްޔާގެ ތަރުޖަމާނު ޔަހްޔާ ސަރްއީ ވަނީ އެމެރިކާއަށް ވަރުގަދަ އިންޒާރުތަކެއް ދެއްވައި ބަޔާނެއް ނެރުއްވާފައެވެ. އެ ބަޔާނުގައި ބުނެފައިވަނީ، އެމެރިކާއިން އީރާނަށް ހަމަލާ ދީފިނަމަ އެމެރިކާގެ ލަޝްކަރު ރަތްކަނޑަށް ފައްތާލާނޭ ކަމަށެވެ.
ރަތްކަނޑުގެ އިތުރުން، ބާބުލް މަންދީބް ކަނޑުއޮޅިއަށް ވަންނަ އެމެރިކާގެ އަސްކަރީ އަދި ކޮމާޝަލް އުޅަނދުތަކަށްވެސް ހަމަލާދީ ފައްތާލާނޭ ކަމުގެ އިންޒާރު ދީފައި ވެއެވެ.
ބާބުލް މަންދީބް ކަނޑުއޮޅިއަކީ ދުނިޔޭގައި ކުރެވޭ ތެލުގެ ވިޔަފާރީގެ 10 އިންސައްތަ ތެޔޮ ކޮންމެ ދުވަހަކު ހުރަސްކުރާ ކަނޑުއޮޅިއެވެ. މީގެކުރިން ހޫޘީން އެ ކަނޑުއޮޅި ބަންދުކުރުމުންވެސް ހަކަތައިގެ އަގު ދުނިޔޭގައި އުފުލިގެން ގޮސްފައި ވެއެވެ.
މިދިޔަ އަހަރު ކަންތައް ވެފައިވާގޮތުން، ހޫޘީންގެ މި އިންޒާރުތަކަށް އެމެރިކާއިން ވަރަށް ސީރިއަސްކޮށް ވިސްނާނެ ކަމަށް ގަބޫލު ކުރެވިފައި ވެއެވެ.
