އީރާނުގެ ނުފޫޒުގަދަ އަސްކަރިއްޔާ، އިސްލާމިކް ރިވޮލިއުޝަނަރީ ގާޑް ކޯޕް، އައިއާރްޖީސީން މިވަނީ އެމެރިކާއަށާއި، ޒަޔަނިސްޓް އިސްރާއީލަށާއި، އަދި އެމެރިކާގެ ބައިވެރިންނަށް ވަރަށް ވަރުގަދަ އިންޒާރުތަކެއް ދީފައެވެ.
އައިއާރްޖީސީން ބުނެފައިވަނީ، ހަނގުރާމައެއްގެ ހުރިހާ ސިނާރިއޯއަކަށް އީރާނުގެ ލަޝްކަރުތައް ތައްޔާރުވެފައިވާ ކަމަށެވެ. އެއްގަމާއި ކަނޑާއި އަދި ވައިގެ ސިފައިންގެ ސަފުތައްވެސް ރުކުރުވާލެވި ތައްޔާރުވެފައިވާ ކަމަށެވެ.
ހަނގުރާމައެއް ފެށިއްޖެނަމަ އެންމެ މުހިންމު ދިމާއަކަށްވާނީ ހޮރްމޫޒު ކަނޑުއޮޅިއެވެ. އެއީ، ދުޝްމަނުން ކަނޑުމަގުން އީރާނަށް ހަމަލާ ދޭނަމަ ގާތްވާން ޖެހޭނީ އެ ކަނޑުއޮޅިން ކަމުގައިވާތީއެވެ. ހޮރްމޫޒު ކަނޑޮއޮޅި ކޮންޓްރޯލް ކުރަނީ އީރާނުންނެވެ.
އެ ކަނޑުއޮޅީގައި އީރާނުގެ ލަޝްކަރުތައް ތަމްރީނުތަކެއް މިހާރުވެސް ކުރިއަށް ގެންދާއިރު، އިރާނާ ގާތަށް އެމެރިކާއިން ޖަމާކޮށްފައިވާ ކަނޑުގެ ބިޔަ އަދި ވަރުގަދަ ލަޝްކަރަށް ފާރަލުންވެސް ކުރިއަށް ގެންދެއެވެ. އެމެރިކާގެ ކަނޑުގެ ލަޝްކަރުގައި ސާޅީސް އެތައް މަނަވަރެއް އެބައޮތެވެ.
އެމެރިކާއިން އީރާނަށް ހަމަލާ ދިނުމުގައި ޒަޔަނިސްޓް އިސްރާއީލުން ބައިވެރިވާނެ ކަމަށް ބެލެވިފައި ވާއިރު، މެދުއިރުމަތީގައި ގައުމުތަކުގައި ހުރި އެމެރިކާގެ އަސްކަރީ ބޭސްތަކާއި، އެއަރބޭސްތަކަށް ހަނގުރާމައިގެ ޖެޓުތަކާއި، ހަތިޔާރާއި ސިފައިންވަނީ ޖަމާކޮށްފައެވެ.
އެމެރިކާއަށް އެހީތެރިވުމަށް އިނގިރޭސިވިލާތާއި ޖަރުމަނު ސިފައިންގެ ޖެޓުތައްވެސް، މެދުއިރުމަތީގެ ބޭސްތަކަށް ޖަމާވެފައިވާ ކަމަށް ރިޕޯޓްތައް ބުނެއެވެ.
އިރާނު އަސްކަރިއްޔާގެ ޑެޕިއުޓީ ކޮމާންޑަރ ހަބީބުﷲ ސައްޔާރީ ވިދާޅުވީ، އެއްގަމާއި ކަނޑު ނުވަތަ ވައިގެމަގުން ވިޔަސް އީރާނަށް ކުރިމަތިވެދާނެ ކޮންމެފަދަ ނުރައްކަލަކާ ކުރިމަތިލުމަށް ސިފައިން ތިބީ ތައްޔާރީ ހާލަތުގައި ކަމަށާއި، ހަނގުރާމައެއް ފަށައިފިނަމަ ދުޝްމަނުންގެ ދުވަސް ދުއްވާލާނޭ ކަމަށެވެ.
އިރާނުގެ އައިއާރްޖީސީން ވަނީ އެމެރިކާއަށް ދެކަމެއް ހަނދާންކޮށްދީފައެވެ. އެއްކަމަކީ، އީރާނުން ބުނެފައިވަނީ މެދުއިރުމައްޗަށް ޖަމާވެފައިވާ އެމެރިކާ ސިފައިން އެމީހުންގެ އާއިލާތަކަށް ފަހުގެ އަލްވަދާއު ކިޔާފައި އައިސް ތިބިކަމަށް ގަބޫލުކުރާ ކަމަށެވެ.
ދެވަނަ ކަމެއްގެގޮތުން ހަނދާން ކޮށްދީފައިވަނީ، އެމެރިކާއިން ސިފައިންނާއި ހަތިޔާރު ޖަމާކޮށްގެން ތިބީ އީރާނުގެ “ވަލުފަރާތަށް” ކަމެވެ. ސަރަހައްދު އެންމެ ރަނގަޅަށް އެނގޭނީ އީރާނަށް ކަމަށާއި، އީރާނަށް ހަމަލާ ދީފިނަމަ ގެއްލުންތައް ލިބޭނީ އެމެރިކާއަށް ކަންވެސް ހަނދާންކޮށްދީފައި ވެއެވެ.
އެމެރިކާ ދިދަ އޮޅާފައިވާ ސަންދޯއްތައް ކަނޑުމަތީގައި އޮޔާދާ މަންޒަރު ފެންނަ، އޭއައި ވީޑިއޯތަކެއް އީރާނުގެ ޓީވީތަކުން ދައްކަމުން ގެންދާއިރު، މިއީ އީރާނުން އެމެރިކާއަށް ދޭ މެސެޖްތަކެވެ.
ރިޕޯޓްތައް ބުނާގޮތުގައި، އެމެރިކާއިން އީރާނަށް ހަމަލާ ދީފިނަމަ އީރާނުން ދިނުމަށް ތައްޔާރުވެފައިވަނީ ކުއްލި އަދި ވަރަށް ވަރުގަދަ ރައްދު ހަމަލާތަކެކެވެ. އެގޮތުން، އެއްފަހަރާ އެތައްހާސް ބެލިސްޓިކް މިސައިލާއި، ހަމަލަދޭ އެތައްހާސް ޑްރޯންއެއް އެއްފަހަރާ އުދުއްސާލަންވެސް ތައްޔާރުވެފައިވާ ކަމަށް ވެއެވެ.
އިސްރާއީލުގެ އަސްކަރީ ޖާސޫސީ މަސްދަރުތަކާ ހަވާލާދީ އިސްރާއީލުގެ މީޑިއާއިން ބުނެފައިވަނީ، ރައްދު ހަމަލާތައް ދިނުމަށް އީރާނުން ފްރަންޓްލައިންގައި މިހާރުވެސް 80،000 އަށްވުރެ ގިނަ ބެލިސްޓިކް މިސައިލް ގާއިމްކޮށްފައިވާ ކަމަށެވެ.
ހަނގުރާމައަށް ތައްޔާރުވުމުގެ ގޮތުން އީރާނުން ގެންދަނީ، ދުވާލެއްގެ މައްޗަށް އެތައްސަތޭކަ މިސައިލާއި ޑްރޯން އުފައްދަމުން ކަމަށްވެސް، އިސްރާއީލުން ބުނެފައި ވެއެވެ.
ކުއްލިއަކަށް އަދި އެއްފަހަރާ އެތައްހާސް މިސައިލާއި ޑްރޯން އުދުއްސާލުމަކީ، އެމެރިކާއިން ބޭނުންކުރާ މިސައިލުން ދިފާއުވާ ޒަމާނީ އައްޑަނަ، ތާޑުއަށްވެސް މަތަކުރަން ފަސޭހަ ވަރެއް ނޫނެވެ.
އީރާނު އަސްކަރިއްޔާގައި ބޭނުންކުރާ އަޑަށްވުރެ އެތައްގުނަ ބާރަށް ދަތުރުކުރާ ހައިޕަރސޮނިކް ބެލިސްޓިކް މިސައިލްތަކަކީ އެމެރިކާގެ އައްޑަނަތަކަށް މަދު ފަހަރެއްގައި މެނުވީ މަތަ ނުކުރެވޭ މިސައިލްތަކެވެ. މިދިޔަ އަހަރު އީރާނުންވަނީ އެކަން ސާބިތުވެސް ކޮށްދީފައެވެ.
އީރާނަށް އަސްކަރީ ހަމަލާއެއް ދިނުމުގެކުރިން އެމެރިކާއިން ހާސްފަހަރު އެކަމާމެދު ވިސްނަން ޖެހިފައިވަނީ އެހެން ވެގެންނެވެ. އެހެންވެ، އެމެރިކާގެ ރައީސް ޓްރަމްޕް މިހާރު ގެންދަނީ އެހެން ގޮތަކުން އީރާނަށް ބިރުދައްކައިގެން ގޮތެއް ހެދޭތޯ މަސައްކަތް ކުރަމުންނެވެ.
އެގޮތުން، އީރާނަށް ތިންކަމެއް ހުށަހަޅައި، އެކަންކަމަށް އެއްބަސްވުމަށް ގެންދަނީ ފިއްތަމުންނެވެ. އެ ތިން ކަމަކީ، ޔޫރޭނިއަމް ފައްކާކުރުން ދާއިމަށް ހުއްޓާލުމާއި، އީރާނުން އުފައްދާ ބެލިސްޓިކް މިސައިލް ދަތުރުކުރާ ދުރުމިން ލިމިޓް ކުރުމާއި، ސްޓޮކް ލިމިޓް ކުރުމުގެ އިތުރުން، ފަލަސްތީނުގެ ހަމާސްއާއި، ލުބުނާނުގެ ހިޒްބުﷲއާއި ޔަމަނުގެ ހޫޘީންނަށް ތާއީދުދިނުން މުޅީން ހުއްޓާލުމެވެ.
ޓްރަމްޕްގެ ހުށަހެޅުންތަކަށް އީރާނުން ދީފައިވާ ޖަވާބަކީ، އީރާނު ކައިރިއަށް ހަނގުރާމައިގެ ލަޝްކަރު ޖަމާކޮށް އީރާނަށް ބިރުދައްކައިގެން އީރާނު ލައްވައި އެއްބަސްވުމެއް ނުހެދޭނޭ ކަމަށެވެ. އީރާނުން މިހާރުވަނީ އުމާން މެދުވެރިކޮށް އީރާނާއި ޓްރަމްޕާ ދެމެދު ބަދަލު ކުރެވެމުންދިޔަ މެސެޖްގެ މުއާމަލާތްވެސް ހުއްޓާލައި ހުރިހާ ގުޅުމެއް ކަނޑާލާފައެވެ.
އީރާނުން ރައްދު ހަމަލާ ދޭއިރު ލިމިޓް ކުރުމަށާއި، އަދި އިސްރާއީލަށް ހަމަލާ ނުދިނުމަށް އެމެރިކާގެ ރައީސް ޓްރަމްޕާއި، އިސްރާއީލުން އީރާނުގެ ކިބައިން އެދުނު އެދުމާވެސް އީރާނު ވަނީ ދެކޮޅު ހަދާފައެވެ.
ކަންތައްތައް ވަމުންދާގޮތުން، އެމެރިކާއަށް އިރާނަށް ހަމަލާދޭން މަޖުބޫރުވަމުންދާ ކަމަށް މަސްރަހް ދިރާސާކުރާ ފަރާތްތަކުން ބުނެއެވެ. އެހެންނަމަވެސް، ޓްރަމްޕް ވިސްނަންޖެހޭ ވަރުވެސް ބޮޑެވެ.
ޔަމަނުގެ ހުޘީން އަންގާފައިވަނީ އީރާނަށް ހަމަލާ ދީފިނަމަ އެމެރިކާއިން އީރާނުގެ ކައިރިއަށް ޖަމާކޮށްފައިވާ ލަޝްކަރު ފައްތާލާނޭ ކަމަށެވެ.
މިދިޔަ އަހަރު، ހޫޘީންގެ ބެލިސްޓިކް މިސައިލް ހަމަލާތައް ވަރުގަދަވެ ސަލާމަތް ހޯދަންވެގެން އެމެރިކާ ސިފައިންގެ ހަނގުރާމަމަތީ މަތިންދާ ބޯޓު އުފުލާ މަނަވަރު ބިރުން ފިލަންވެގެން ދުއްވާލުމުން، މަނަވަރަށް ޖައްސަން އައި އެތައް ޖެޓެއް ކަނޑަށް ވެއްޓުނު ހަންދާން އެމެރިކާ ސިފައިން އެބަ ހުއްޓެވެ. މިކަން ތަކުރާރުވާކަށް އެމެރިކާގެ އަސްކަރިއްޔާވެސް ބޭނުމެއް ނުވެއެވެ.
ކަނޑުގެ ސަރަހައްދަށް ބިޔަ ލަޝްކަރުތައް ޖަމާކޮށް، ގައުމުތަކަށް ނަފްސާނީ ބިރުދެއްކުމަކީ އެމެރިކާގެ އަސްކަރިއްޔާއިން ގެންގުޅޭ މުސްކުޅި އުކުޅެއްކަން އެންމެނަށްވެސް އެނގެއެވެ.
އެހެންވެ އީރާނުގެ އައިއާރްޖީސީން އެމެރިކާއަށް އަންގަނީ ކެރެންޏާ ހަނގުރާމަ ފެށުމަށެވެ. އެމެރިކާއިން ހަނގުރާމަ ފަށައިފިނަމަ ހަނގުރާމަ ނިންމާނީ އީރާނުން ކަމަށް ގެންދަނީ ބުނަމުންނެވެ.
