މުޒާހަރާތަކާ ގުޅިގެން އީރާނަށް އަސްކަރީ ހަމަލާދޭން އެތައް އިންޒާރެއްކޮށް، އެތައް ވާހަކައެއް ފުރަތަމަ ދައްކާފައި، އެމެރިކާގެ ރައީސް ޑޮނަލްޑް ޓްރަމްޕާއި، ޒަޔަނިސްޓު އިސްރާއީލުގެ މުޖުރިމު ނަތަންޔާހޫ ފަހުން ދެއްކި ވާހަކަތަކުން ހާމަވީ، އެމީހުން ބޭނުންވަނީ އީރާނުގެ ވެރިކަން ބަދަލުކޮށްލުމަށް ކަމެވެ.
އީރާނަށް ދޭންފަށާ ހަމަލާތައް ދިގުލައިގެން ހިނގައިދާނެ ކަމަށާއި، އީރާނުގެ ވެރިކަން ބަދަލު ކުރެވި އީރާނުގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލެވުމުން މެނުވީ ހަމަލާތައް ހުއްޓާނުލަން އެމެރިކާއާއި އިސްރާއީލު ރާވާފައިކަން ހާމަވެފައި ވެއެވެ.
އެމެރިކާއިން އީރާނަށް ފުރަތަމަ ހަމަލާދޭން އުޅެފައި މަޑުޖައްސާލީ ވެރިކަން ބަދަލުކުރުމުގެ ހަމަލާތަކެއް ފަށަން، އިސްރާއީލުވެސް ތައްޔާރުވުމަށް ވަގުތު ބޭނުންވާތީކަން ފަހުން އެނގުނެވެ.
އެމެރިކާގެ ރައީސް ޑޮނަލްޑް ޓްރަމްޕް ދެކެ ބިރުން، މުޒާހަރާތައް އެންމެ ހޫނުވި ދުވަސްކޮޅު ޚާމަނާއީ ފިއްލަވައިފި ކަމަށް، އިސްރާއީލާއި އެމެރިކާގެ ބައެއް ފަރާތްތަކުން އަދި އީރާނާ ދުޝްމަން އެތައް ބަޔަކު ބުނަމުން ގޮސްފައި ވެއެވެ.
އެމެރިކާއިން އީރާނަށް ދޭ ހަމަލާއެއްގެ ފުރަތަމަ އަމާޒަކީ ޚާމަނާއީކަން ކަށަވަރު ވެފައިވާތީ، ޚާމަނާއީ ހުންނެވީ ސިއްރު ތަނެއްގައި، ބިމުއަޑީގައި ހަދާފައިވާ ބިންގަރާހެއްގައި ކަމަށްވެސް ބުނަމުން ގެންދެއެވެ.
އަދި ފުރާނައިގެ ސަލާމަތަށް އެދިގެން ޚާމަނާއީ ރަޝިޔާއަށް ގެންދެވިއްޖެ ކަމަށްވެސް، ޚާއްސަކޮށް ޒަޔަނިސްޓު ބޮޓުން ސޯޝަލް މީޑިއާގައި ވާހަކަތައް ފަތުރަމުން ގެންދެއެވެ.
އީރާނު ރައްޔިތުންގެ ހިތްތަކުގައާއި، ޚާމަނާއީއަށް ތާއީދުކުރާ މީހުންގެ މެދުގައި ބިރުވެރިކަމާއި ކަންބޮޑުވުން އުފެއްދުމަށް ބޮޓުން ގެންދަނީ ކެނޑިނޭޅި މަސައްކަތް ކުރަމުންނެވެ.
އެމެރިކާ އަދި އިސްރާއީލުގެ އެކި މުއައްސަސާތައް ރަމްޒުކޮށްދޭ އެކައުންޓުތައް ހަދައި، ޚާމަނާއީ ދުނިޔޭގައި ހުރެގެން އީރާނަށް އަދި ސަރަހައްދަށްވެސް ސުލްހަ ނުގެނެވޭނޭ ކަމަށް ބުނަމުން ގެންދެއެވެ.
އަދި އީރާނުގެ ރޫހީ ލީޑަރު އާޔަތުﷲ އަލީ ޚާމަނާއީ އަކީ އެމެރިކާގެ ގައުމީ ސަލާމަތަށްވެސް ނުރައްކާ ބޭފުޅެއް ކަމަށް ބުނެ ވާހަކަތައް ފަތުރަމުން ގެންދެއެވެ.
2025 ވަނަ އަހަރު އީރާނާއި އިސްރާއީލާ ދެމެދު ކުރި 12 ދުވަހުގެ ހަނގުރާމައިގައި ޒަޔަނިސްޓުން އެންމެ އިސްކަންދިން އެއް ކަމަކީ ޚާމަނާއީ އަވަހާރަ ކޮށްލުމެވެ. އެހެންވެ، އެގޮތަށް ބަލައި ރާވައިގެން ތެހެރާނަށް ހަމަލާތަކެއް ދިނެވެ.
ސިދާ ޚާމަނާއީ އަވަހާރަކޮށްލަން ހަމަލާތައް ދިންކަމަށް ޒަޔަނިސްޓު ޖެނެރަލުން ފަހުން އެއްބަސް ވެފައިވެސް ވެއެވެ. އަދި ހަމަ އެއާއެކު، އެކަން ކާމިޔާބު ނުވީ، ޚާމަނާއީ ސީދާ ހުންނެވި ތަނެއް ނޭނގުމުގެ ސަބަބުން ކަމަށް ޖެނެރަލުން އިއުތިރާފް ވެފައި ވެއެވެ.
އެކަމަކު، އީރާނުގެ އެތެރެއިން ފެންނަ މަންޒަރުތަކުން، އެމެރިކާއާއި ޒަޔަނިސްޓު ބޮޓުން ފަތުރަމުންދާ ދޮގު ވާހަކަތަކަކީ ހަގީގަތެއް ނޫންކަން ވަރަށް ސާފެވެ. އިއްޔެވެސް ޚާމަނާއީ ވަނީ އާޏްމުންގެ ތެރެއަށް ނުކުމެވަޑައިގެން އާންމުންނާ ބައްދަލުވެސް ކުރައްވާފައެވެ. އިއްޔެ ޚާމަނާއީ ފެނުނީ އެހެންޏާ ވަޑައިނުގަންނަވާ އާންމު ތަނަކުންނެވެ.
އަދި ދުޝްމަނުންނަށް ވަރުގަދަ އިންޒާރުތަކެއް ދެއްވާފައި ވެއެވެ. ވިދާޅުވީ، އީރާނަށް ހަމަލާ ދީފިނަމަ މުޅި ސަރަހައްދުގައި ހަނގުރާމައެއް ފެށިގެންދާނޭކަން ނިކަން ރަނގަޅަށް ދަތުމަށެވެ.
އީރާނުން ބުނަމުން ގެންދަނީ ރޫހީ ލީޑަރު ޚާމަނާއީއަކީ އަވަހާރަ ކޮށްލަފާނެތީ ބިރުން ފިއްލަވާނޭ ބޭފުޅެއް ނޫން ކަމަށާއި، އެއަށްވުރެ ހިތްވަރުގަދަ، އަޒުމްވަރުގަދަ ބޭފުޅެއް ކަމަށެވެ. ފަހުނޭވާޔާ ހަމައަށް ދެމިހުންނަވާނީ އީރާނުގެ ރައްޔިތުންނާ އެކުގައި ކަމަށެވެ.
