މިދިޔަ އަހަރުގެ ޖޫންމަހުގެ ތެރޭގައި އެމެރިކާއިން އީރާނުގެ ނިއުކްލިއަރ ސައިޓްތަކަށް ދިން ވަރުގަދަ ވައިގެ ހަމަލާތަކުގެ ތެރޭގައި، އީރާނުގެ ސައިޓަކަށް ވައްޓާލި ބަންކަރ ބަސްޓަރ ނުވަތަ ބިންގަނޑު ތޮރުފައިގެން ވަދެ ގޮއްވާލައިގެން ހަމަލާދޭ ބާވަތުގެ ބޮންތަކެއް ނުގޮވާ އެބަހުރިކަން އީރާނުގެ ޚާރިޖީ ވަޒީރު އައްބާސް އަރަޣްޗީ މިއަދު ކަށަވަރު ކޮށްދެއްވުމާއެކު އެމެރިކާއާއި އިސްރާއީލުގެ ވެރިން ތެޅިފޮޅޭން ފަށައިފިއެވެ.
މި ޚަބަރު ދުނިޔޭގެ މީޑިއާތަކުން ވަރަށް ބާރަށް ފަތުރަމުން އެބަ ގެންދެއެވެ. ސޯޝަލް މީޑިއާގައިވެސް ފަތުއަޑު ކިޔާފައި ފެތުރެމުން އެބަ ދެއެވެ.
އީރާނުގެ ނިއުކްލިއަރ ސައިޓްތަކަށް އެމެރިކާ ސިފައިން މުޅިންހެން ހަމަލާދިނީ ޖީބީޔޫ-57 ބަންކަރ ބަސްޓަރ ބޮމުންނެވެ. މިއިން ބޮމެއްގެ ބަރުދަނަކީ 14 ޓަނެވެ.
ބަންކަރ ބަސްޓަރ ބޮމުގެ އިތުރުން، ޓޮމަހޯކް ކްރޫޒް މިސައިލާއި، އެފް-35 ޖެޓުތަކުންވެސް، އީރާނުގެ ނިއުކްލިއަރ ސައިޓްތަކަށް އެމެރިކާ ސިފައިން ހަމަލާ ދިނެވެ.
އީރާނުގެ ޚާރިޖީ ވަޒީރު ވިދާޅުވީ، ނުގޮވާ ހުރީ އީރާނުގެ ފޯރޑޯ ނިއުކްލިއަރ ފެސިލިޓީއަށް އެޅި ބޮންތަކެއް ކަމަށެވެ. އެ ބޮންތައް ހުރީ ބިމުއަޑިއަށް ވަނުމަށްފަހު ވަޅުލެވިފައެވެ.
ނަމަވެސް ނުގޮވާ އޮތީ ކިތައް ބޮންކަމެއް ވިދާޅެއް ނުވެއެވެ.
ނުގޮވާހުރި ޖީބީޔޫ-57 ބަންކަރ ބަސްޓަރ ބޮންތަކެއް ހުރި ކަމަށް އީރާނުގެ ޚާރިޖީ ވަޒީރު ވިދާޅުވި ނަމަވެސް، އެ ބޮންތަކުގެ ފޮޓޯ އީރާނުން ހާމަކޮށްފައެއް ނުވެއެވެ.
އެމެރިކާއިން ބޭނުންކުރާ އެންމެ މި ޒަމާނުގެ ބަންކަރ ބަސްޓަރ ނުގޮވާ ހުރި ބޮންތަކެއް އެބަހުރި ކަމަށް އީރާނުން ހާމަކުރުމާ ގުޅިގެން އެންމެ ބޮޑު ބިރެއް ކުރިމަތިވެފައިވަނީ އިސްތިއުމާރީ އިސްރާއީލަށެވެ.
ސަބަބަކީ، ނުގޮވާ ހުރި ބޮންތައް ރޫޅައި، އެ ޓެކްނޯލޮޖީ ބޭނުންކޮށްގެން އީރާނުން އެފަދަ ބޮންތަކެއް ހަދައި އިސްރާއީލާ ދެކޮޅަށް ބޭނުން ކޮށްފާނެތީއެވެ.
އަދި ހަމަ އެއާއެކު، އިސްރާއީލުން ސިއްރު ކުރިއަށް ގެންދާ ނިއުކްލިއަރ ހަތިޔާރު ޕްރޮގްރާމްގެ އިސް ސައިންވެރިން މަރާލަންވެސް އީރާނުން މިބާވަތުގެ ބޮން އުފައްދައިގެން ބޭނުން ކޮށްފާނެތީ އިސްރާއީލުގެ ވެރިން މިހާރު ތިބީ ބިރުން ވިރިވިރިއެވެ.
އީރާނަށް އަސްކަރީ ހަމަލާދިނުމަށް އެމެރިކާގެ ރައީސް ޑޮނަލްޑް ޓްރަމްޕް، އީރާނާ ގާތަށް އަސްކަރީ ބިޔަ ލަޝްކަރެއް ޖަމާކުރި ނަމަވެސް، އީރާނަށް ހަމަލާ ދޭން އުޅޭ މަންޒަރެއް އަދި ނުފެނެއެވެ.
އޭގެ ބަދަލުގައި ޓްރަމްޕް މަސައްކަތް ކުރަމުން ގެންދަނީ، އީރާނުން ކުރިއަށް ގެންދާ ނިއުކްލިއަރ ޕްރޮގްރާމާއި، ބެލިސްޓިކް މިސައިލް ޕްރޮގްރާމް ހުއްޓުވާލުމަށެވެ.
އެކަމަކު، މިދިޔަ އަހަރުގެ ޖޫންމަހުގެ އީރާނަށް ހަމަލާދިނުމަށްފަހު އެމެރިކާގެ ރައީސް ތަކުރާރުކޮށް އެތައް ފަހަރަކު ބުނެފައިވަނީ، އެމެރިކާއިން ދިން ވަރުގަދަ ވައިގެ ހަމަލާތަކުގައި އީރާނުގެ ނިއުކްލިއަރ ސައިޓްތަކާއި، މިސައިލް ޕްރޮގްރާމްގެ ތަންތަން އެއްކޮށް ހަލާކުކޮށްލެވި ސުންނާފަތި ކޮށްލެވުނު ކަމަށެވެ.
އެ މަސައްކަތް އަލުން ފަށަން އީރާނަށް އެތައް އަހަރެއް ނަގާނޭ ކަމަށްވެސް ޓްރަމްޕް ބުނަމުން ގޮސްފައި ވެއެވެ.
އެކަމަކު، އަނެއްކާވެސް ލަޝްކަރު ޖަމާކޮށް އީރާނާ ދެކޮޅަށް ހަނގުރާމަ ފަށަން އެމެރިކާގެ ރައީސް އުޅެނީ އީރާނުގެ ނިއުކްލިއަރ ޕްރޮގްރާމްގެ މައްސަލައިގައި ކަމަށް ބުނެއެވެ.
އީރާނަށް ހަމަލާ ދިނުމަށް އެމެރިކާގެ ރައީސް ޓްރަމްޕްގެ ބޮލަށް ހުތްއަޅައި ސަވާރުވަމުންދަނީ އިސްރާއީލުގެ މުޖުރިމު ނަތަންޔާހޫއެވެ. ޓްރަމްޕް އީރާނާ ވާހަކަ ދައްކަމުން ގެންދާއިރު، ޓްރަމްޕަށް ޕްރެޝަރ ކުރަން ނަތަންޔާހޫ އަނެއްކާ ތައްޔާރުވަމުންދަނީ އެމެރިކާއަށް ދިއުމަށެވެ.
އީރާނުގެ ނިއުކްލިއަރ ޕްރޮގްރާމް ނުހުއްޓުވައި އަދި ބެލިސްޓިކް މިސައިލް އުދުހޭ ދުރުމިން ލިމިޓް ނުކުރެވޭނަމަ އިސްރާއީލުގެ ސަލާމަތަށް އެއްވެސް ޔަގީންކަމެއް ނެތްކަމަށް، ނަތަންޔާހޫ މިހާރުވަނީ ޓްރަމްޕަށް އަންގާފައެވެ.
އަދި އީރާނަށް ހަމަލާ ދިނުމަށް އެމެރިކާ ފަސްޖެހޭނަމަ އިސްރާއީލުން އަމިއްލައަށްވެސް އެކަން ކުރާނޭ ކަމަށް ވަނީ، ޓްރަމްޕަށް އަންގާފައެވެ.
މިހާރު އެނގޭ ކަމަކީ، އެމެރިކާއިން ދުނިޔޭގައި ކުރާ ހުރިހާ ހަނގުރާމައަކީ އިސްރާއީލުގެ ހައްގުގައި ކުރާ ހަނގުރާމަތަކެއް ކަމެވެ.
