ނަފްރަތުގެ އަމަލުތަކަކީ ކުށެއްގެ ގޮތުގައި ކަނޑައެޅުމަށް ގާނޫނުލް އުގޫބާތަށް ހުށަހަޅާފައިވާ އިސްލާހު ފާސްކުރުމުގެ ހިތްވަރު ސަރުކާރުގެ ކިބައިގައި ނުވާނަމަ އެމަނިކުފާނުގެ ތާއީދެއް ސަރުކާރަށް ނެތްކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އިނގިރޭސި ބަހުން ރައީސް ނަޝީދު މިއަދު ނެރުއްވި ބަޔާނުގައި ވިދާޅުވީ، އެމްޑީޕީ އިން ގަބޫލުކުރާ އެންމެ އަސާސީ ސިފަތައް ތަންފީޒުކުރުމުގެ ހިތްވަރު އެމްޑީޕީގެ ލީޑާޝިޕްގެ ތެރޭ އޮންނަން ވާނެ ކަމަށެވެ.
އެމަނިކުފާނު ވިދާޅުވީ، ގިނަ ދިވެހީންނަކީ، ކުރިއެރުމަށް ތާއީދުކުރާ ބައެއް ކަމަށެވެ. މިނިވަންކަމާއެކު އުޅުމާއި، ހިޔާލު ފާޅުކުރުމުގެ މިނިވަންކަމާއި، މިއުޒިކާއި ސަގާފަތާއި އިގުތިސާދީ ފުދުންތެރިކަމަށް ދިވެހީން ލޯބިކުރާ ކަމަށް ވެސް ވިދާޅުވިއެވެ. ހަމައެހެންމެ ދިވެހީންނަކީ ކާބަފައިން ގެންގުޅުނު މެދުމިނުގެ ދީނީ ވިސްނުމެއް ގެންގުޅޭ ބައެއް ކަމަށް ވެސް އެމަނިކުފާނު ވިދާޅުވިއެވެ.
ރައީސް ނަޝީދު ވިދާޅުވީ، އެމަނިކުފާނު އަވަހާރަކޮށްލަން ދިން ހަމަލާއަކީ ހަރުކަށި ފިކުރުގެ މީހުން، އެހެން މީހުން ކާފަރުކުރުމަށް ހިންގާ އަމަލުގެ ތެރެއިން ހިންގި އަމަލެއް ކަމަށާއި އެފަދަ އަމަލުތައް ހުއްޓުވުމަށް ނަފްރަތުގެ ބިލަކީ މުހިންމު ބިލެއް ކަމަށެވެ.
ނަޝީދު އިތުރަށް ވިދާޅުވީ ސަރުކާރުން އެ ބިލް ހުށައެޅުމާއެކު ސަރުކާރުގެ ކޯލިޝަންގައި ހިމެނޭ އަދާލަތު ޕާޓީން އެ ބިލާ ދެކޮޅު ހެދުމާއެކު ސަރުކާރުން ވެސް އެކަމަށް ފަސް ޖެހިފައިވާކަމަށެވެ. އަދި ނަފްރަތުގެ ބިލް ފާސްނުކޮށްފިނަމަ އެމަނިކުފާނުގެ ތާއީދު ސަރުކާރަށް ނޯންނާނެ ކަމަށްވެސް ވިދާޅުވިއެވެ.
ނަފުރަތުގެ އަމަލު ބަޔާންކޮށް، ގާނޫނުލްއުގޫބާތަށް އިސްލާހު ގެނައުމަށް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި ބިލު ދިރާސާކުރި މަޖިލީހުގެ ޖުޑިޝަރީ ކޮމިޓީއަށް އަލުން ފޮނުވުމަށް މަޖިލީހުގެ ތަޅުމުން މި މަހުގެ އަށްވަނަ ދުވަހު ވަނީ ފާސްކޮށްފައެވެ.
