ހދ. ހަނިމާދޫ ކައުންސިލުން ބަނދަރު ބޭނުންކުރުމާ ގުޅޭގޮތުން ކަނޑައަޅާފައިވާ އުސޫލުތަކާ އެއްގޮތަށް ޢަމަލު ނުކުރާ ފަރާތްތަކަށް ފިޔަވަޅު އެޅުމަށް ނިންމައިފިއެވެ.
ކައުންސިލުން ނެރުނު އިޢުލާނުގައި ބުނެފައިވާ ގޮތުގައި، ބަނދަރުގައި އުޅަނދުފަހަރު އެޅުމަށް ކަނޑައަޅާފައިވާ އުސޫލާ އެއްގޮތަށް، އުޅަނދުފަހަރަށް ދޫކުރެވިފައިވާ ބޯސާތަކަށް އެ އުޅަނދުފަހަރު ބަދަލުކުރުމުގެ މުއްދަތު 2025 ފެބުރުވަރީ 18 ވަނަ ދުވަހުގެ ނިޔަލަށް ދީފައިވެއެވެ. އަދި ބަނދަރުގައި ވެލި ޖެއްސުމަށް ކަނޑައަޅާފައިވާ ސަރަޙައްދަށް ވެލި ބަދަލުކުރުމުގެ މުއްދަތު 2025 ފެބުރުވަރީ 20 ވަނަ ދުވަހުގެ ކުރިން ހަމަވާނެއެވެ.
މި ތާރީޚުތަކުގެ ފަހުން އުޅަނދުފަހަރު ޤަވާއިދާ ޚިލާފަށް ބަހައްޓާފައި ހުރިނަމަ، ކަނޑައެޅިފައިވާ ގޮތުގެ މަތިން ޖޫރިމަނާ ކުރެވޭނެ ކަމަށް ކައުންސިލުން ބުނެފައިވެއެވެ. އަދި ވެލި ބަހައްޓަން ކަނޑައަޅާފައިވާ ތަން ފިޔަވައި އެހެން ތަނެއްގައި، ޚާއްޞަކޮށް ޕޭވްމަންޓް މަތީގައި ވެލި ބަހައްޓައިފިނަމަ، އެ ވެލި ނަގައި ނައްތާލެވޭނެ ކަމަށާއި، ނައްތާލެވޭ ވެލީގެ ޒިންމާ ކައުންސިލުން ނުއުފުލާނެ ކަމަށްވެސް ބުނެފައިވެއެވެ.
މީގެ އިތުރުން، ބަނދަރުގެ ޓީ ޖެޓީ ސަރަޙައްދުގައި 24 ގަޑިއިރަށްވުރެ އިތުރަށް މުދާ ނުބެހެއްޓުމަށާއި، އިތުރު ވަގުތަށް މުދާ ބަހައްޓަން ޖެހޭނަމަ ކައުންސިލުގެ ހުއްދަ ލިޔުމުން ހޯދުމަށް އަންގާފައިވެއެވެ. ހުއްދައަކާ ނުލައި ބަހައްޓާ މުދާ އެ ސަރަޙައްދުން ނަގައި ނައްތާލެވޭނެ ކަމަށްވެސް ކައުންސިލުން ބުނެފައިވެއެވެ.
މި އުސޫލުތައް ތަންފީޒުކުރުމުގެ މަޤްޞަދަކީ ބަނދަރު ބޭނުންކުރުމުގައި ހަރުދަނާ ނިޒާމެއް ޤާއިމުކުރުމާއި، ބަނދަރުގެ ވަސީލަތްތައް އެންމެ ފުރިހަމަ ގޮތުގައި ބޭނުންކުރެވޭނެ މާޙައުލެއް އުފެއްދުމެވެ. މި ފިޔަވަޅުތަކުގެ ސަބަބުން ހަނިމާދޫ ބަނދަރުގެ ޚިދުމަތްތައް އިތުރަށް ހަރުދަނާވެ، ރައްޔިތުންނަށް ލުއިފަސޭހަވެގެންދާނެއެވެ.
