އަބަދުވެސް ތާއީދު ކުރާނީ ރިޔާސީ ނިޒާމަށް ކަމަށް މޯލްޑިވްސް ރިފޯމް މޫވްމެންޓް (އެމްއާރްއެމް)އިން ބުނެފިއެވެ.
އެމްއާރްއެމްއިން މިފަދައިން ބުނެފައިވަނީ އަދާލަތު ޕާޓީ އަދި އެމްއާރްއެމް އިން ނިޒާމުގެ ފެންނަ ނުފެންނަ ވޯޓަކަށް ދިއުމަށް ތާއިދު ކުރިކަމަށް ރައީސް މުހައްމަދު ނަޝީދު ވިދާޅުވުމާ ގުޅިގެން އެކަމަށް ރައްދުދީއެވެ.
އެގޮތުން އެމްއާރްއެމްއިން ބުނެފައިވަނީ އެ ޕާޓީން އަބަދުވަސް ތާއީދު ކުރަނީ ރިޔާސީ ނިޒާމަށްކަމަށެވެ.
އެނޫން ނިޒާމަކަށް ތާއީދު ކުރުމަށް އެއްވެސް ނިންމުމެއް ނިންމާފައި ނުވާނެކަމަށާއި، ނުވަތަ އެއްވެސް ފަރާތަކާއި އެކު އެއްބަސް ވެފައިވެސް ނުވާނެ ކަމަށްވެސް އެމްއާރްއެމްއިން ބުނެފައިވެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް ނަޝީދު ވިދާޅުވީ ރައީސް ސޯލިހަށް އެމްޑީޕީގެ ރިޔާސީ ޓިކެޓު ލިބުނުއިރު އެމަނިކުފާނު ނިކުންނެވީ އެމްޑީޕީގެ މެނިފެސްޓޯއާ އެކުކަމަށެވެ. އެހެންނަމަވެސް އިތުރު ޕާޓީތަކާއި އެކު ކޯލިޝަން ހަދަންޖެހުމުން އެޕާޓީތަކުން އެދުނު މެނިފެސްޓޯއަކަށް ތާއީދުކުރެއްވީ ކަމަށެވެ.
އެހެންނަމަވެސް ނިޒާމުގެ ފެންނަ ނުފެންނަ ވޯޓަކަށް ދިއުމަށް އަދާލަތު ޕާޓީއާއި އެމްއާރްއެމުން ތާއީދުކުރެއްވި ކަމަށާއި، އެކަމަށް ތާއީދުނުކުރީ ޖޭޕީން ކަމަށް ރައީސް ނަޝީދު ވިދާޅުވިއެވެ.
