މިހާރު އެންމެ ފޯރިގަދަވެ ރައްޔިތުންނަށް އިވެނީ އެމްޑީޕީ އެތެރޭގެ އިންތިހާބުގެ ވާހަކައެވެ. ރައީސް އިބްރާހިމް މުހައްމަދު ސޯލިހުގެ ފަޅިއާއި ރައީސް ނަސީދުގެ ފަޅީގެ ކޯޅުމުގެ ވާހަކައެވެ. މިއުޅެނީ އެ ކޯޅުމުގެ ވާހަކަ ދައްކާކަށް ނޫނެވެ.
ދައްކަން މިއުޅެނީ ރިޔާސީ އިންތިހާބާއި ރައްޔިތުން މަޖިލީސް އިންތިހާބު އަދި ކައުންސިލް އިންތިހާބުގައި މިހާރުގެ ސަރުކާރުން އުތުރުގައި ހިންގަން ގޮވި ބިޔަބޮޑު މަޝްރޫއު އަދި ކިޔެއްތަ ކޮންމެ އިންތިހާބެއް ބޯމަތިވާއިރަށް ފަލަ ސުރުހީއަށް އަރާ ހަނިމާދޫ އެއާޕޯޓް ބޮޑުކުރުމުގެ ވާހަކައެވެ.
މި ހަމަ ބުނެލި ބުނުން ތަކެއްނޫނެވެ. އެތަކެއް ހަބަރު ފަތުރާ ވަސީލަތްތަކުގައި އެހުރީ އެ ވާހަކަ ރައްކާކުރެވިފައެވެ. މި ގޮތުން ބައެއް ތާރިހުތައް މިތަނުގައި ހިމަނާލާނަމެވެ.
- 2019 ވަނަ އަހަރު އެޕުރީލް 1 ވަނަދުސް މިހާރުގެ ރައިސް، މިހާރުގެ ހަނިމާދޫ ދައިރާ މެންބަރު ގަފޫރު ކެންޕޭނަށް ހަނިމާދޫއަށް އައިސް ވާހަކަ ދައްކަމުން ބުނެފައިވަނީ މިހާރަށްވުރެއް އެއާޕޯޓް ފެންވަރު ރަނގަޅުކޮށް ޖައްސާ ފުލައިޓްތައް އިތުރުކުރަން ކުރަން ޖެހޭ މަސައްކަތް ކުރަމުންދާކަމަށެވެ.
- 2020 ވަނަ އަހަރު ޖެނުވަރީ ނުވަވަނަ ދުވަހު ހަބަރުތަކަށް ބަލާއިރު ހިންގާލާ ވަޒީރު ވަނީ ތާރީހެއް ދެއްވާފައެވެ. އެއީ އެއަހަރު އެއާފޯޓް މަޝްރޫއު ފެށުމަށެވެ. އެއީ އެމްޑީޕީން ބޭއްވި ތިލަދުންމަތި ކޮންފަރެންސްގައެވެ. އެދުވަހު ހިންގާލި ބަސްކޮޅަކީ ހުރިހާ ކަމެއް ކާމިޔާބުވުމަށްޓަކައި އެންެމެ މުހިންމު އެއް ކަމަކީ ރަނގަޅު އިންޓަނޭޝަނަލް އެއާޕޯޓެއް އޮތުން ކަމަށާއި، އެއީ ހަމައެކަނި އިންޓަނޭޝަނަލް އެއާޕޯޓުގެ ބޯޑެއް އަޅުވާލާފައި އޮތުން ނޫން ކަމަށެވެ.
- 2020 ވަނަ އަހަރުގެ ސެޕްޓެންބަރ 15 ވަނަ ދުވަސް : އިންޑިއާ ސަރުކާރުގެ އެހީގައި ހދ. ހަނިމާދޫ އިންޓަނޭޝަނަލް އެއާޕޯޓު ތަރައްގީ ކުރުމަށް ކުރިއަށްގެންދާ މަޝްރޫއުގެ އަމަލީ މަސައްކަތް އަންނަ އަހަރުގެ ޖެނުއަރީގައި ފަށާނެ ކަމަށް ޓްރާންސްޕޯޓް އެންޑް ސިިވިލް އޭވިއޭޝަން މިނިސްޓްރީ އިން ބުނެފައިވެއެވެ.
- 2020 ވަނަ އަހަރު ނޮވެންބަރ 19 ވަނަ ދުވަހު ރައީސް ވިދާޅުވީ ހދ. ހަނިމާދޫގައި އަންނަ އަހަރު މުޅިން އައު އިންޓަނޭޝަނަލް އެއާޕޯޓެއް ތަރައްޤީކުރުމުގެ މަސައްކަތް ފައްޓަވާނެކަމަށެވެ.
- 2021 ވަނަ އަހަރު ފެބުރުއަރީ 21 ވަނަ ދުވަސް : ހަނިމާދޫ އެއަރޕޯޓު އަޕްގްރޭޑްކުރުމުގެ މަސައްކަތް ކުރުމަށް މިއަހަރުގެ ޖުލައި މަހު ބަޔަކާއި ހަވާލުކުރެވޭނެކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޟް އިސްމާޢީލް ވިދާޅުވިއެވެ.
- 2022 މާރިޗް 20 ވަނަ ދުވަސް : ހިންގާލަން އުޅުއްވާ ވަޒީރު ވިދާޅުވީ 15 އޭޕުރީލްގައި ހަނިމާދޫ އެއާޕޯޓް ބޮޑުކުރުމުގެ މަޝްރޫއުގައި ސޮއި ކުރެވޭނެކަމަށާއި ސޮއި ކުރުން އޮންނާނީ ހަނިމާދޫގައި ކަމަށެވެ.
މަތީގައި ހިމަނާލެވިފައިވާ ތާރީހްތަކަށް ނަޒަރު ހިންގާލާއިރު އިނގެނީ އާރާ ބާރާ ސައުގަތު ލިބި ހިންގާލަން ގޮވާ ވަޒީރަށް ނުހިންގޭކަމެވެ. އެހެން ކަމުން ތިލަތުންމަތީ ރައްޔިތުން ވިސްނާލުން ބުއްދިވެރި ނޫންހެއްޔެވެ.
އެބަޔަކު އެދުނު ހުރިހާކަމެއް އެދުނުގޮތަށް ތަބަކަށް ލައިދިނީމަވެސް ވީކަމެއް ހަމަނެތެވެ. ހިންދީ ފިލުމެއްގެ މަސްހޫރު ޑައިލޮގެއްގައި ބުނާގޮތް ނޫން ގޮތެއް ވާތަނެއް ނުފެނެއެވެ. ހަމަވަނީ އެހެނެވެ. ތާރީހަކަށް ފަހު ތާރީހެކެވެ. އިންތިހާބަކަށްފަހުން އިންތިހާބެކެވެ. ހިންގާލަން ވެސް ހަވާލު ކުރަންވީ އެވެ. ވާ ވައުދު ނުފުދުނަސް ވަރިހަމައެވެ. 2023 އައުމުން ދެވަނަ ދައުރެއްވެސް ދޭންވި ޔޯލައެވެ!
ކޮމަންޑޫގެ އިންތިހާބުން ހިތްވަރު ލިބިގަނެ މިފަހަރު މި ވައުދު ފުއްދަން މަޖުބޫރުކުރުވުން ކީއްހެއްޔެވެ.
