ހަނިމާދޫގެ ގިނަބަޔަކު ވަޒީފާ އަދާކުރަމުން އަންނަ އަދި ދުވާލަކު 5 ނުވަތަ އެއަށްވުރެއް ގިނަ ފުލައިޓް ޖައްސާ ހަނިމާދޫ އެއާޕޯޓަށް ދާ މަގުގެ ހާލަތު މިވަނީ އޮށްވަޅު ގޮނޑި އަކަށްވުރެއްވެސް ހާލު ދެރަވެފައެވެ.
އޮށްވަޅު ގޮނޑީގައި ވަޅުތައް ހުންނަނީ ވަކި ތަރުތީބަކުން ކަން އެންމެނަށްވެސް އިނގޭނެކަން ކަށަވަރެވެ. ހަނިމާދޫ ރަންވޭ މަގުގައި (އެއާޕޯޓް އިންވަކިކުރާ ކަށިނަރުން ފެށިގެން އެއާޕޯޓާ ހަމައަށް އޮންނަމަގު) ގައި ވަޅުތައް ހުންނަނީ އުކައިލާފައެވެ. އެއްވަޅުން ނަންޓައިލާން އުޅެފިނަމަ އިތުރު 5 ވަޅުގަނޑު އެމީހަކަށް މަރުހަބާ ކިޔާނެއެވެ.
މޫސުން ގޯސްވެއްޖެނަމަ އެއާޕޯޓް ފާލަން އެއީ ބޭނުން ކުރުން އިންތިހާއަށް ނުރައްކާ ތަނަކަށް ވެގެން ދިއުމުން، މާލެ ފުރުމަށް ރަށުން ބޭރުން އަންނަމީހުން ލަފަނީ އަވަށުގައިވާ ބަނދަރަށެވެ. އެތަނަށް ފައިބާ ތާރުމަގުތަކުން ގޮސް އެއާޕޯޓް މަގަށް އެ މީހުން ފޯރުމުން ކަނޑުގައި ކުރެވުނު ތަޖުރިބާ އެމަގުން ކުރަން ޖެހިދެއޭ ބުނުމަކުން ދޮގަކަށްނުވާނެއެވެ. ކާރު ޑުރައިވަރު ކިތަންމެ ބަލައިގެން ދުއްވިއަސް އެމިހާ ހަމަޖެހިލައިގެން ސީޓުގައި އިންނާނެ ވަގުތެއް ނުލިބޭނެއެވެ.
ރައްޔިތުންގެ ތަކުލީފު ލުއިކުރަން ސަރުކާރުން މާބޮޑު ކަމެއް ނުކުރިޔަސް ރައީސުލް ޖުމްހޫރިއްޔާ 2021 ވަނަ އަހަރު ޖުލައި މަހު ހަނިމާދޫއަށް އައުމަށް އެއް ދުވަހަށް ވުމުން އެމަގު އެއްވަރު ކުރެވުނެވެ. އެދުވަހު އެމަގު އެއްވަރުކުރި މެޝިނަރީތައް އަދިވެސް މި ހަނިމާދޫގައި އެބަހުއްޓެވެ. އެމަނިކުފާނު ކާރަށް ގުޑުން އަރާ އަރިކައްޓަށް ތަދެއްއަރާ ފާނެތީ އެކަން ކުރިފަދައިން އެތައް ރައްޔިތެއްގެ ތަކުލީފަށް ލުޔެއް ހޯދައި ނުދޭންވީ ސަބަބެއް ނުވިސްނެއެވެ.
