ތިބާގެ ބަހަކީ ވެސް ހަރުވެ ގަދަވާނޭ އެއްޗެކެވެ. އަދި ބަލިކަށިވެ ނިކަމެތި ވެސް ވެދާނޭ އެއްޗެކެވެ. ތިބާގެ ބަހޭ މިތަނުގައި މާނަ މި ކުރަނީ ތިބާ ނަގަހައްޓާ އަގުކުރުންތަކާއި އުސޫލުތަކާއި މަބާދިއުތަކަށެވެ.
ތިބާއަކީ ތިބާ ގަބޫލުކުރާ އަގުކުރުންތަކާއި އުސޫލުތަކާއި މަބާދިއުތަކުގައި ތެދުވެރި އިޚްލާޞްތެރިއެއް ނަމަ، ތިބާ އެ ކަންކަން ނަގަހައްޓައި ދަމަހައްޓާނެއެވެ. އެއީ ތިބާއަށް ތިބާގެ ފުރާނައަށް ވުރެ މުހިންމު ކަމެވެ.
ތިބާގެ ބަސް ތިބާ ދަމަހައްޓާހާ ހިނދަކު، ތިބާގެ ބަސް ދާނީ ވަރުގަދަ ވަމުން، ގަދަވަމުންނެވެ. ދުވަސް ވާވަރަކަށް އިތުރަށް ވަރުގަދަވާނެއެވެ. އެއީ ހިލާގައި ކަނޑާ ނެގިފައިވާ ބަހެއް ފަދަ ބަހެކެވެ. އެ ބަހަކީ އެހެން މީހުންގެ ކައިރީގައި މަޤްބޫލު ބަހަކަށް ވެގެން ދާނެއެވެ. އެހެން މީހުން ގަބޫލުކުރާ ބަހަކަށް ވެގެން ދާނެއެވެ. އެހެން މީހުން އިތުބާރުކުރާ ބަހަކަށް ވެގެން ދާނެއެވެ.
އެހެނަސް، ތިބާގެ ބަހަކީ ދެ އިރަށް ބަދަލުވާ އެއްޗެއް ނަމަ، ތިބާގެ ބަސް ބަލިކަށިވާނެއެވެ. އެއީ ކަނޑުގައި އެޅޭ ރޮނގެއް ފަދަ ބަހެކެވެ. އެ ބަސް ގަބޫލުކުރާ މީހުން މަދުވާނެއެވެ. އެ ބަހަށް އިތުބާރުކުރާ މީހުން މަދުވާނެއެވެ. އެ ބަހަކީ އެއްވެސް އަގެއް ނެތް ބަހެކެވެ.
