ހަނިމާދޫ ކައުންސިލުން ބާއްވާ އާންމު ބައްދަލުވުންތަކުގެ ޔައުމިއްޔާ އާއްމުކުރުން ހުޓާލިތަ؟ ނޫނީ ރައްޔިތުންނަށް ކަމެއް ފޮރުވަނީތަ؟ މި ދެ ސުވާލަށް ޖަވާބު ދޭން ކިޔުންތެރިނަން ދޫކޮށްލާނަމެވެ.
ހަނިމާދޫ ކައުންސިލުން 4 ވަނަ ދައުރުފަށާ އެ ކައުންސިލްގެ ރަސްމީ ވެބްސައިޓް ވުޖޫދު ކުރުމަށްފަހު އެ ކައުންސިލްގެ ޖަލުސާތަކުގެ ޔައުމިއްޔާ އާއްމުކުރަމުން ގެންގޮސްފައިވެއެވެ.
ނަމަވެސް އެންމެފަހުން އާއްމުކޮށްފައިވަނީ މީގެ 7 މަސްކުރިން އެކައުންސިލްގެ 49 ވަނަ ޖަލުސާގެ ޔައުމިއްޔާއެވެ. އެއީ 26 މޭ 2022 ގައި ބޭވުނު ޖަލުސާއެވެ. އެޖަލުސާގެ ޔައުމިއްޔާއަށް ބަލާއިރު ނަންބަރު 1-4 ހުރީ ޖަލުސާތަކުގެ ޔައުމިއްޔާ ފާސްކުރުމެވެ. އެދުވަހު ފާސްކުރީ ޖަލުސާ ނަންބަރު 37، 46، 47، 48 އެވެ. ހިތާމައަކީ މިއަދާ ހަމައަށްވެސް މި ޖަލުސާތަކުގެ ޔައުމިއްޔާ އާއްމު ކޮށްފައިނުވާތީއެވެ.
ދެން އޮތީ އެޖެންޑާ އާއްމު ކުރޭތޯ ބަލައިލުމެވެ. އެކަން އަދި އެބަ ހިނގައެވެ. އެންމެފަހުން އާއްމުކޮށްފައިވަނީ 81 ވަނަ ބައްދަލުވުމުގެ އެޖެންޑާއެވެ. އެއީ 15 ފެބުރުއަރީ 2023 ވަނަ ދުވަހު ބޭއްވުނު ޖަލުސާގެ އެޖެންޑާއެވެ. އޭގައިވާގޮތުން ހަނިމާދޫ ކައުންސިލްގެ އާންމު 80 ވަނަ ބައްދަލުވުމުގެ ޔައުމިއްޔާވަނީ ފާސްކޮށްފައެވެ.
ޔައުމިއްޔާ ފާސްކުރަނީ ކިހިނެއް؟
ޔައުމިިއްޔާ ފާސްކުރަން ހުށަހަޅަނީ ޖަލުސާ ފެށުމުގެ ކުރިން، ކުރިން ބޭއްވި ޖަލުސާގެ ރިކޯޑިން އަޑުއަހާ އެ ލިޔުމަށްފަހު މެންބަރުންނާ އެ ހިއްސާކުރުމަފަހުއެވެ.
ދެން އުފެދޭ ސުވާލަކީ ލިޔެ ތައްޔާރުކޮށް މެންބަރުންނާއި ހިއްސާކޮފައި އޮންނަ އެއްޗެއް އެފާސްކުރުމުން އާއްމު ރައްޔިތުންނާ ހަމަޔަށް ހިއްސާކުރަން ލަސްވަނީ ކިޔެއްވެގެން ތޯ؟ މި ސުވާލު ޖަވާބު ދެއްވަމުން ހަނިމާދޫ ކައުންސިލްގެ އެސްޖީ މުހައްމަދު އާސިފް ވިދާޅުވީ މިހާރު ޔައުމިއްޔާ އާންމު ނުކުރަނީ ކައުންސިލުގެ ރައީސްގެ އެންގެވުމަކަށް ކަމަށާއި މިހާރު އާއްމުކުރަނީ ޖަލުސާތަކުގެ ނިންމުން ކަމަށެވެ.
ރައީސްގެ މި ނިންމެވުން ބަދަލުކުރުމުގެ މަސައްކަތެއް ކައުންސިލުގެ އެއްވެސް މެންބަރެއް ކުރެއްވިތޯ މީވެސް ސުވާލެކެވެ. އެކަމުގެ ވާހަކަ ބައްދަލުވުމަކަށް ހުށަހެޅިތޯއެވެ. އެސް.ޖީ ލަފާފުޅެއް އެރުވިތޯއެވެ.
ނިންމުންތައް އާއްމު ކުރާއިރުވެސް މިހާތަނަން އާއްމު ކޮށްފައިވަނީ 69 ވަނަ ޖަލުސާގެ ނިންމުންތަކެވެ. މިހާތަނަން 80 ވަނަ ޖަލުސާ ބަވާފައިވާއިރު 79 ވަނަ ޖަލުސާގެ ޔައުމިއްޔާވަނީ ފާސްކޮށްފައެވެ. އެހެންކަމަށް ވާނަމަ 79 ވަނަ ޖަލުސާގެ ނިންމުންތައް އާއްމުކުރަން މިހާރު ލަސްވެއްޖެކަމަށް ގަބޫލުނުކުރެވޭ ހެއްޔެވެ؟
