މައިގަނޑު އިގްތިސާދީ އަސާސްތައް މިވަނީ އެކޮޅުކޮޅުން ޖެހިފައި ކަމަށް ޕީޕީއެމް–ޕީއެންސީގެ ރިރާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދު ހދ. ކުރިނބީ ރައްޔިތުންނާ ބައްދަލުކުރައްވަމުން ޑރ. މުއިއްޒު ވިދާޅުވީ ކުޑަ އާބާދީތަކަށް ކަންކަން ކުރެވޭ ވަރަށް ދައުލަތަށް ކޮންމެ މަހަކު ފައިސާ ވަންނަ ކަމަށާއި، ނަމަވެސް ކުރަން ނުޖެހޭ ހަރަދުތައް ކުރުމާއި، އިސްކަން ދޭންޖެހޭ ކަންކަމަށް އިސްކަން ނުދިނުމާއި. ފައިސާ ޗާޕުކުރުމާއި، މުސާރަދިނުމަށް ލޯނު ނެގުން ފަދަ ކަންކަން ސަރުކާރުން ކުރާ ކަމަށް ޑރ. މުއިއްޒު ވިދާޅުވިއެވެ. މީގެ ސަބަބުން މައިގަނޑު އިގްތިސާދީ އަސާސްތައް މިވަނީ އެފުށްމިފުށަށް ޖެހިފައި ކަމަށްވެސް ވިދާޅުވިއެވެ.
މީގެ އިތުރުން ޑރ. މުއިއްޒުގެ ސަރުކާރެއްގައި އިގްތިސާދީ ސިޔާސަތު ހަމައަކަަށް އަޅުވާނެ ކަމަށާއި، ދައްކަންޖެހޭ ލޯނުތައް ދެއްކުމުގެ މަސައްކަތް ކުރާނެކަމަށް ވިދާޅުވިއެވެ. އެގޮތުން މިހާރުވެސް ގާތް ރަހުމަތްތެރި ބައެއް ދިމަދިމާލުން ބޮޑެތި ލޯނުތައް ރީފައިނޭންސް ކުރުމުގެ ގޮތަތަކަށް ‘ގްރީން ސިގްނަލް’ ލިބިފައި ހުރިކަން ޑރ. މުއިއްޒު ފާހަގަކުރެއްވިއެވެ.
އެހެންކަމުން ރާއްޖޭގެ އިގްތިސާދީ ސިޔާސަތު ހައްލުކުރުމުގައި އެއްވެސް ކަންބޮޑުވުމެއް ނެތް ކަމަށްވެސް ޑރ. މުއިއްޒު ވިދާޅުވިއެވެ.
