ގުރައިދޫ އެއާޕޯޓު މަޝްރޫއު މި އަހަރުގެ ބަޖެޓުގައި ނުހިމަނާ އޮތްނަމަވެސް އެ މަޝްރޫއު ހިންގަވަން ގޮތެއް ފަހިކުރައްވާ މި އަހަރު މަސައްކަތް ފައްޓަވާނެކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިކަން އިއުލާންކުރެއްވީ އެމަނިކުފާނު ރައީސުލްޖުމްހޫރިއްޔާގެ މަގާމާ ހަވާލުވެވަޑައިގަތުމަށްފަހު އަތޮޅު ތެރެއަށް ކުރެއްވި ފުރަތަމަ ދަތުރުފުޅުގައި މިއަދު ތ. ގުރައިދޫއަށް ވަޑައިގެން އެރަށު ރައްޔިތުންނާ މުހާތަބު ކުރައްވާ ދެއްކެވި ވާހަކަފުޅުގައެވެ.
ރައީސް މުއިއްޒު އަތޮޅު ތެރެއަށް ކުރައްވާ ފުރަތަމަ ދަތުުރުފުޅުގައި ގުރައިދޫއަށް ވަޑައިގަތީ މިދިޔަ ރިޔާސީ އިންތިހާބުގައި އެމަނިކުފާނަށް އެންމެ ގިނަ ވޯޓު ހޯދައިދޭ ރަށަކަށް އެންމެ ފުރަތަމަ ވަޑައިގަންނަވާނެ ކަމަށް ވެވަޑައިގެންނެވި ވައުދު ފުއްދުމުގެ ގޮތުންނެވެ. ނިމިދިޔަ ރިޔާސީ އިންތިހާބުގައި އެންމެ ގިނަ ވޯޓު ރައީސް މުއިއްޒަށް ލިބިވަޑައިގަތީ ތ. ގުރައިދޫންނެވެ.
ތ. ގުރައިދޫގައި އެއާޕޯޓެއް އެޅުމަކީ ރައީސް ޑރ. މުހައްމަދު މުއިއްޒު ވެވަޑައިގެންނެވި ރިޔާސީ ވައުދެކެވެ. އަދި އެރަށާ މާދުރު ނޫން ހިސާބެއްގައި އޮތް ތ. ވިލުފުށީގައި އެއާޕޯޓެއް އެޅުމަކީވެސް ރައީސް މުއިއްޒުގެ ރިޔާސީ ވައުދެކެވެ.
“އަޅުގަނޑުމެންނަށް ގާނޫނީ އިމުގެ ތެރެއިން ކަންކުރެވޭނެ ގޮތް ހޯދޭނެ. ހޯދާނަން. ހޯދާފައި އިރާދަކުރެއްވިއްޔާ މިއަހަރު މަސައްކަތް ފަށާނަން. ތިބޭފުޅުންނަށް އެންމެ މުހިއްމު އަޅުގަނޑު ގާތުގައި ދެންނެވި ކަމަކީ އެއީ. އެކަން ކުރާނެ ކަމަށް އަޅުގަނޑު ދެންނެވި. އެކަން އިރާދަކުރެއްވިއްޔާ ކޮށްދޭނަން،” ގުރައިދޫ އެއާޕޯޓް މަޝްރޫއު މިއަހަރުގެ ބަޖެޓްގައި ހިމެނުމަށް ފޮނުވުމުން މިހާރު އޮތް އެމްޑީޕީގެ އަގުލަބިއްޔަތު އޮތް މަޖިލީހުން އެކަމަށް ފައިސާ ނުދިންކަން ފާހަގަކުރައްވާ ރައީސް ވިދާޅުވި އެވެ.
އެމަނިކުފާނު ވިދާޅުވީ ގުރައިދޫ އާއި އަދި އެހެން ރަށްރަށުގައި އެ ރަށެއްގެ ރައްޔިތުން ކުރަން ބޭނުންވާ ކަންކަން ހުންނާނެ ކަމަށް ގަބޫލުކުރައްވާ ކަމަށެވެ. އެގޮތަށް ކުރަން ހުރި ކަންކަން އިސްކަންދޭ ގޮތަކަށް ތަރުތީބު ކުރައްވައި ކަމާ ގުޅޭ މިނިސްޓްރީތަކާ ހިއްސާކުރުމުން އެކަންކަން އިގްތިސާދީ ހާލަތު ހުރި ގޮތަކަށް ބަލައި ކޮށްދެއްވާނެ ކަމުގައިވެސް ވިދާޅުވި އެވެ.
މިސަރުކާރުގައި މުޅިން އަލަށް 15 ރަށެއްގައި ޑޮމެސްޓިކް އެއާޕޯޓް އެޅުމަށްވެސް ސަރުކާރުން ދަނީ މަސައްކަތްތަކެއް ކުރަމުންނެވެ. ތ. ގުރައިދޫގައި އެއާޕޯޓެއް އެޅުމަށް ތައްޔާރުވަމުންދާއިރު އެ އަތޮޅު ތިމަރަފުށީގައި މިހާރުވެސް އެއާޕޯޓެއް އެބައޮތެވެ.
