ކުޅުދުއްފުށީ ޕޯޓުގެ ޚިދުމަތް ފުޅާކުރުމަށް ސަރުކާރުން ފަށްޓަވާފައިވާ މަސައްކަތްތަކުގެ ތެރެއިން އިތުރު މުހިންމު ޚިދުމަތްތަކެއް މިއަދު އިފްތިތާޙު ކޮށްފި އެވެ.
މި ހިދުމަތްތައް އިފްތިތާހުކޮށްފައިވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިހާރު ހދ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ކުޅުދުއްފުށީގައި ބޭއްވި ރަސްމިއްޔާތެއްގަ އެވެ. މި ޚިދުމަތްތައް އިފްތިތާޙު ކުރެއްވީ އިކޮނޮމިކް މިނިސްޓަރު މުޙައްމަދު ސަޢީދެވެ.
ކުޅުދުއްފުށީ ޕޯޓު ސަރަޙައްދުގައި މިއަދު ހަވީރު ބޭއްވުނު ރަސްމިއްޔާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވެސް ބައިވެރިވެ ވަޑައިގެންނެވި އެވެ. މިއީ 2025 މޭ 19 ގައި މިނިސްޓްރީ އާއި މޯލްޑިވްސް ޕޯޓްސް ލިމިޓަޑް (އެމް.ޕީ.އެލް) އާ ދެމެދު ވެވުނު އެއްބަސްވުމެއްގެ ދަށުން ފެށިގެންދިޔަ ޚިދުމަތްތަކެކެވެ.
އަލަށް ތަޢާރަފުކުރެވުނު ޚިދުމަތްތަކުގެ ތެރޭގައި:
- ކާބޯތަކެއްޗާއި އަސާސީ މުދާ ޑިއުޓީ ނުދައްކާ ރައްކާކުރުމަށް ބޮންޑެޑް ސަރަޙައްދެއް
- އުތުރުގެ ރިސޯޓުތަކަށް އަމާޒުކޮށްގެން ތަޢާރަފުކުރެވުނު ބޮންޑެޑް ވެއަރހައުސްގެ ޚިދުމަތް
- ޑޮމެސްޓިކް ވިޔަފާރިވެރިންނަށް މުދާ ބޭލުމަށް ޚާއްޞަ ސަރަޙައްދެއް
- ޢިމާރާތްކުރުމުގެ ތަކެތި ބަލްކްކޮށް ރައްކާކުރުމަށް ޚާއްޞަ ސަރަޙައްދެއް
މި ޚިދުމަތްތަކުގެ ސަބަބުން މުދާ އުފުލުމުގެ ޚަރަދު ކުޑަވެ، ބާޒާރުގެ އަގުތައް ހަމައަކަށް އެޅި، އުތުރުގެ އަތޮޅުތަކަށް މުދާ ފޯރުކޮށްދިނުމުގެ ނިޒާމު އިތުރަށް ހަރުދަނާވެގެންދާނެ އެވެ.
ސަރުކާރުގެ އަމާޒަކީ ކުރިއަށް އޮތްތަނުގައި ޑިމާންޑަށް ބަލައި، ބޮންޑެޑް ސްޓޯރޭޖުގެ ޚިދުމަތްތައް އިތުރަށް ފުޅާކުރުމެވެ. މިނިސްޓަރ ސަޢީދު ވިދާޅުވި ގޮތުގައި މިއީ ސަރަޙައްދީ ވިޔަފާރި ކުރިއެރުވުމަށާއި، އިޤްތިޞާދީ ނަފާ ހަމަހަމަކަމާއެކު ފޯރުކޮށްދިނުމަށް އެޅޭ މުހިންމު ފިޔަވަޅެކެވެ.
މި ޚިދުމަތްތަކަކީ ތިލަދުންމަތީ އަދި އުތުރުގެ އެހެނިހެން ސަރަޙައްދުތަކުގެ ތަރައްޤީގައިވެސް ކުޅުދުއްފުށީ ސިޓީން އަދާ ކުރާ އިސް ދައުރު ފުޅާވެގެން ދިއުމަށް މަގުފަހިވުމުގެ އިތުރުން، ސަރުކާރުން ދެމެހެއްޓެނިވި ތަރައްޤީ، ފުޑް ސެކިއުރިޓީ، އަދި ވިޔަފާރީގެ ޙަރަކާތްތައް މުޅި ރާއްޖެއަށް ފުޅާކުރުމަށް ދެއްވާ އިސްކަން ރަމްޒުކޮށްދޭ މުހިއްމު މަޝްރޫޢެކެވެ.
