އީރާނަށް ހަމަލާ ދިނުމުގެ ފުރުސަތަކަށް ބަލަބަލާ އޮތީ އިސްރާއީލު ކަމަށާއި، އެމެރިކާ ނޫން ކަމަށް ތުރުކީގެ ޚާރިޖީ ވަޒީރު ހަކަން ފިދާން ވިދާޅުވެއްޖެއެވެ.
އެންޓީވީއަށް ދެއްވި އިންޓަރވިއުއެއްގައި ހަކަން ފިދާން ވިދާޅުވީ، ތުރުކީއަށް ލިބިފައިވާ ޖާސޫސީ މައުލޫމާތުތަކުން އެނގޭގޮތުގައި، އީރާނަށް އަސްކަރީ ހަމަލާ ދޭން އުޅެނީ އިސްރާއީލުން ކަމަށާއި، އެމެރިކާއިން ނޫންކަން ފެންނަމުންދާ ނިޝާންތަކުން ހާމަވާ ކަމަށެވެ.
ނަމަވެސް، އެއީ ކޮން ކަހަލަ ނިޝާންތަކެއް ކަމެއް އަދި އަދި ތުރުކީއަށް ލިބިފައިވާ ޖާސޫސީ މައުލޫމާތުގެ އިތުރު އެއްވެސް ތަފްސީލެއް ތުރުކީގެ ޚާރިޖީ ވަޒީރު ނުދެއްވައެވެ.
ތާރީޚްގައިވެސް މިހާތަނަށް އެމެރިކާއިން ޖަމާ ނުކުރާ ވަރަށް މެދުއިރުމައްޗަށް ހަތިޔާރާއި ސިފައިން ޖަމާކުރަމުން ގެންދާއިރު، އިނގިރޭސިވިލާތް، އިޓަލީ އަދި ޖަރުމަނުގެ ބޮންއަޅާ ޖެޓުތައްވެސް އުރުދުންގައި އޮންނަ އެމެރިކާގެ ބޭހަށް ޖަމާވަމުން އެބަ ދެއެވެ.
އެމެރިކާއިން އީރާނަށް ހަމަލާދޭއިރު އެކަމުގައި އިސްރާއީލު ބައިވެރިވާނޭކަން ކަށަވަރު ވެފައި ވެއެވެ.
އީރާނަށް ހަމަލާދިނުމަށް އެމެރިކާއަށް އެންމެބޮޑަށް ހިތްވަރުދީ، އެމެރިކާގެ ރައީސްގެ ބޮލަށް ހުތްއަޅައި މަސްރަހް ގޯސްކުރަމުން ގެންދަނީ އިސްރާއީލުގެ މުޖުރިމު ނަތަންޔާހޫއެވެ.
އެމެރިކާއާއި ހުޅަނގުގެ ބައިވެރިން ނުވަތަ އިސްރާއީލުން އީރާނަށް ހަމަލާދޭން ފަށާފާނެ ކަމަށް ވަރަށް ބޮޑަށް ބެލެވިގެން ޔޫރަޕްގެ ބައެއް އެއަރލައިންތައް އިސްރާއީލަށާއި، ގަލްފްގެ ގައުމުތަކަށް ދަތުރުކުރުންވެސް މިހާރު ވަނީ ހުއްޓާލާފައެވެ. ދަތުރުތައް ހުއްޓާލި އެއަރލައިންތަކުގެ ތެރޭގައި ކޭއެލްއެމް އަދި ލުފްތާންސާ ހިމެނެއެވެ.
އީރާނުން އިސްރާއީލަށް ދީފާނެ ރައްދު ހަމަލާއަކަށް އިސްރާއީލު ފުރިހަމައަށް ތައްޔާރުވެފައިވާކަން އިސްރާއީލު މީޑިއާއިން ރިޕޯޓް ކޮށްފައި ވެއެވެ.
އެހެންކަމުން، އެމެރިކާއިން ނުވަތަ އިސްރާއީލުން އީރާނަށް ހަމަލާތައް ދޭން ފަށާނޭ ކަމަށް ވަރަށް ބޮޑަށް ބެލެވޭ ކަމަށް، އެކިއެކި މަސްދަރުތަކުން ހާމަކުރެއެވެ.
މުޅި ދުނިޔޭގެ ނަޒަރު މިހާރު ހުއްޓިފައި ހުރީ އީރާނާ ދިމާއަށެވެ.
އީރާނު އަސްކަރިއްޔާއިން ހުކުރު ދުވަހު ބުނެފައިވަނީ، އީރާނު އޮތީ ފުރިހަމައަށް ތައްޔާރަށް ކަމަށާއި، މިއީ އިސްރާއީލުގެ ނިންމުން އަންނާނެ ހަނގުރާމައަށް ވެގެންދާނޭ ކަމަށެވެ.
