ދައުލަތުގެ ރިޒާވްގައި މިހާރު 650 މިލިއަން ޑޮލަރަށްވުރެ ގިނަ ފައިސާ އެބަހުރި ކަމަށާއި، އަންނަ މަހު ދައްކަންޖެހޭ 500 މިލިއަން ޑޮލަރުގެ ސުކޫކު މިއަދު ދައްކަން ޖެހުނު ކަމުގައިވިޔަސް އެ ފައިސާ ދެއްކޭނެ ފުރިހަމަ ގާބިލްކަން ސަރުކާރުގައި އެބަހުރި ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ދެއްވައިފިއެވެ.
ރައީސް އޮފީހުގައި ބޭއްވެވި މިއަހަރުގެ ފުރަތަމަ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، ރާއްޖޭގެ މާލީ ހާލަތާ ގުޅޭގޮތުންނާއި ރިޒާވްގައި ފައިސާ ހުރި މިންވަރުގެ ތަފްސީލުތައް މީގެކުރިން ރިޔާސީ ބަޔާނުގައި ވެސް ހާމަކުރައްވާފައިވާނެ ކަމަށެވެ.
ރާއްޖޭގެ އިގްތިސާދީ ދުވެލި ބާރުވަމުންދާކަން ފާހަގަކުރައްވައި ރައީސް ވިދާޅުވީ، އަންނަ އޭޕްރީލް މަހުގެ އަށްވަނަ ދުވަހަކީ 500 މިލިއަން ޑޮލަރުގެ ސުކޫކު ދައްކަންޖެހޭ ތާރީޚު ކަމަށްވާއިރު، އެކަމަށް ބޭނުންވާ ފައިސާ މިހާރުވެސް ވަނީ ކަށަވަރުކުރެވިފައެވެ. މި މައުލޫމާތުތައް އިތުރަށް ތަފްސީލުކޮށްދެއްވަމުން ރައީސް ވިދާޅުވީ، ފެބުރުވަރީ މަސް ނިމުނުއިރު ރިޒާވްގައި 650 މިލިއަން ޑޮލަރަށްވުރެ ގިނަ ފައިސާ ރައްކާކުރެވިފައިވާ ކަމަށެވެ. މީގެ ތެރެއިން ސޮވްރިންގ ޑިވެލޮޕްމަންޓް ފަންޑު (އެސް.ޑީ.އެފް) ގައި އެކަނިވެސް ރޭގެ ނިޔަލަށް 320 މިލިއަން ޑޮލަރަށްވުރެ ގިނަ ފައިސާ ހުރިކަން އެމަނިކުފާނު ފާހަގަކުރެއްވިއެވެ.
ރައީސް ވިދާޅުވި ގޮތުގައި، ސަރުކާރުން މިހާރު ވަނީ ބޭރުގެ ދަރަނިތައް އަދާކުރުމުގައި އޮތް ބިރުވެރިކަން ނައްތާލާފައެވެ.
500 މިލިއަން ޑޮލަރުގެ ސުކޫކު ދެއްކުމަށްފަހުވެސް، ރިޒާވްގައި ބާކީ 150 މިލިއަން ޑޮލަރަށްވުރެ ގިނަ ފައިސާ ހުންނާނެކަން ރައީސް ކަށަވަރުކޮށްދެއްވިއެވެ. މިއީ ރާއްޖޭގެ މާލީ ހަމަޖެހުން ގާއިމުކުރުމަށް ސަރުކާރުން ކުރަމުންދާ މަސައްކަތުގެ ނަތީޖާކަމަށް އެމަނިކުފާނު ސިފަކުރެއްވިއެވެ.
ރާއްޖޭގެ ގްރޮސް ރިޒާވްއާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، ރާއްޖޭގެ ތާރީޚުގައިވެސް ގްރޮސް ރިޒާވް މައްޗަށް ނުދާ މިންވަރަށް މިހާރު ވަނީ އުފުލިފައި ކަމަށެވެ. އެގޮތުން ރިޔާސީ ބަޔާނުގައި ވިދާޅުވި ރެކޯޑު އަދަދަށްވުރެ ވެސް މިހާރު ރިޒާވް މައްޗަށް ގޮސްފައިވާ ކަމަށާއި، މިހާރު ގްރޮސް ރިޒާވްގައި 7 ބިލިއަން ޑޮލަރު އެބަހުރި ކަމަށް ރައީސް ވިދާޅުވިއެވެ.
