މި އަހަރުގެ ރޯދަމަހުގެ ފަހު 10 ގެ ދުވަސްތަކުގައި ބޭންކް އޮފް މޯލްޑިވްސް (ބީއެމްއެލް) އިން ހިދުމަތް ދޭނެ ދުވަސްތަކާއި ގަޑިތައް އެ ބޭންކުން މިއަދު އިއުލާންކޮށްފިއެވެ.
ބީއެމްއެލް އިން ބުނި ގޮތުގައި، ފަހު 10 ގެ ދުވަސްތަކުގައި އެ ބޭންކުގެ ބްރާންޗުތަކުން ހިދުމަތް ދިނުމަށް ހުޅުވާނީ އަންނަ ހަފުތާގެ ބުދަ ދުވަހާއި މި މަހުގެ 18 ވާ ބުދަ ދުވަހު އެކަނި ކަމަށެވެ. މި ދުވަސްތަކުގައި ބޭންކު ހުޅުވާފައި ހުންނާނީ ހެނދުނު 9:30 އިން މެންދުރު 12:30 އަށް ކަމަށް އެ ބޭންކުން މައުލޫމާތު ދެއެވެ.
ބްރާންޗުތައް ބަންދުވި ނަމަވެސް، ފަހު 10 ގެ ދުވަސްތަކުގައި ވެސް ބޭންކުގެ ހުރިހާ ހިދުމަތެއް އޮންލައިންކޮށް ލިބޭނެ ކަމުގެ ޔަގީންކަން ބީއެމްއެލް އިން ވަނީ ދީފައެވެ. މީގެ އިތުރުން، އޭޓީއެމް މެދުވެރިކޮށް ފައިސާ ނެގުމާއި ޖަމާކުރުމުގެ ހިދުމަތް ވެސް މެދުނުކެނޑި ލިބޭނެއެވެ.
ރޯދަމަހަށް ފަހު އަންނަ ޝައްވާލް މަހުގެ ފުރަތަމަ ހަ ދުވަހު ނުވަތަ ހަ ރޯދައިގެ ދުވަސްތަކުގައި ބޭންކު ހުޅުވާނެ ގަޑިތައް ވެސް ބީއެމްއެލް އިން ވަނީ ހާމަކޮށްފައެވެ. އެގޮތުން ހަ ރޯދައިގެ ދުވަސްތަކުގައި ވެސް ބްރާންޗުތައް ހުޅުވާނީ ކޮންމެ ދުވަހެއްގެ ހެނދުނު 9:30 އިން މެންދުރު 12:30 އަށެވެ.
