ރާއްޖޭގައި ތިބި އެންމެ އުމުރުން ދުވަސްވީ މީހުންގެ ތެރެއިން ހިމެނޭ މީހަކު ނިޔާވެއްޖެއެވެ.
މިއަދު ހެނދުނު ނިޔާވެފައިވަނީ ޏ. ފުވައްމުލަކު، ފަތަނގުމާގޭ އަލީ ސުލައިމާންއެވެ. އޭނާ މަރުވިއިރު އުމުރަކީ 106 އަހަރެވެ.
އެނގިފައިވާ ގޮތުގައި އައިޖީއެމްއެޗަށް ގެންގޮސް ހެދި ކޮވިޑް ޓެސްޓުތަކުގެ ނަތީޖާ ވަނީ ޕޮޒިޓިވްވެފައެވެ. އެހެންނަމަވެސް މިއީ ކޮވިޑް މަރެއްގެ ގޮތުގައި މިހާތަނަށް އެޗްޕީއޭއިން ނިންމައިފައެއް ނުވެއެވެ.
އެގޮތަށް ކަނޑައަޅައިފި ނަމަ، ސުލައިމާން ވެގެންދާނީ ކޮވިޑުގައި ރާއްޖޭން މަރުވި އެންމެ ދުވަސްވީ މީހާއަށެވެ.
ރާއްޖޭގެ އެންމެ ދުވަސްވީ މީހާ ހއ. ހަތިފުއްޓަށް އުފަން، ހދ ހަނިމާދޫ އަންނާރުމާގެ އަބްދުއްރަހުމާން މޫސާ (ހަތިފުށީ ރަހުމާންބެ)، 2020 ވަނަ އަހަރު ނިޔާވީވެސް އުމުރުން 106 އަހަރުގަ އެވެ. އޭނާ ނިޔާވީ މުސްކުޅި ބަލީގައި ކުއްލި ގޮތަކަށެވެ.
