ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ އިން އެމެރިކާން ވަކިވާން އާ ރައީސް ޑޮނަލްޑް ޓްރަމްޕް ގަރާރެއް ނެރުއްވައިފި އެވެ.
ވެރިކަމުގެ ފުރަތަމަ ދުވަހު އޭނަ ނެރުއްވި ގަރާރުގައި ބުނެފައި ވަނީ ޑަބްލިއުއެޗްއޯ އަކީ ޒިންމާދާރު މަސައްކަތެއް ކުރާ ޖަމާއަތެއް ނޫން ކަމަށެވެ. އެގޮތުން މީގެ ހަތަރު ވަރަކަށް އަހަރު ކުރިމަތިލާން ޖެހުނު ކޮވިޑް-19 ގެ ވަބާއާ ގުޅިގެން ވެސް ޑަބްލިއުއެޗްއޯ އަށް ހަރުދަނާ މަސައްކަތެއް ކުރެވިފައި ނުވާ ކަމަށް ބުނެފައިވެ އެވެ.
އަދި އެ ބައްޔަކީ ޗައިނާގެ ވޫހާން ސިޓީން އުފަންވި ބައްޔެއް ކަމަށާއި ކޮވިޑާ ގުޅޭ މައުލޫމާތުތައް ވެސް އެންމެ އެކަށީގެންވާ ގޮތަށް ޑަބްލިއުއެޗްއޯ އަށް ފޯރުކޮށް ނުދެވި އެކަމުގެ އަގު މުޅި ދުނިޔެ ދައްކަން ޖެހުނު ކަމަށެވެ.
އަލުން ވެރިކަމަށް ވަޑައިގެން ޑަބްލިއުއެޗްއޯ އިން އެމެރިކާ ވަކިވާން ޓްރަމްޕް ސޮއި ކުރައްވައި ގަރާރެއް ނެރުއްވި އިރު، މިއީ އޭނަ މިގޮތަށް ނިންމެވި ދެވަނަ ފަހަރެވެ. ދެހާސް ވިހީގައި ވެސް ޓްރަމްޕް އެފަދަ ގަރާރެއް ނެރުއްވި އެވެ. އޭރުގެ ގަރާރު އުވައިލެއްވީ އެ އަހަރު ރިޔާސީ އިންތިހާބު ކާމިޔާބު ކުރައްވައި 2021 ގައި ވެރިކަމާ ހަވާލުވެވަޑައިގެންނެވި ޖޯ ބައިޑެން އެވެ.؟
