ކުރީގެ ރައީސް އަބްދުﷲ ޔާމީން ޖަލު ބަންދުގައި ހުންނެވި މުއްދަތަށް ލިބެން ޖެހޭ އިނާޔަތުގެ ތެރެއިން ހޯދުމަށް އެދިވަޑައިގެންނެވި 2.4 މިލިއަން ރުފިޔާ ފިނޭންސް މިނިސްޓްރީން ޖަމާކޮށްދީފި އެވެ.
ޔާމީން ފިނޭންސް މިނިސްޓްރީގައި އެދިފައިވަނީ ޖަލުގައި ހުންނެވި މުއްދަތުގައި ލިބެންޖެހޭ ރައީސުލްޖުމްހޫރިއްޔާ ކަންކޮށްފައިވާ ފަރާތްތަކަށް ދޭންޖެހޭ އިނާޔަތްތައް ހޯއްދެވުމަށެވެ. އެ ފައިސާ މިހާރު ޖަމާކޮށްދީފައިވާ ކަމަށް ފިނޭންސުން ބުނެ އެވެ.
ޔާމީންގެ އިނާޔަތްތަކާ ގުޅޭގޮތުން އެމަނިކުފާނުގެ ވަކީލުން ވިދާޅުވީ ޔާމީންގެ މައްޗަށް 28 ނޮވެމްބަރު 2019 ވަނަ ދުވަހު، ކްރިމިނަލް ކޯޓުން ހުކުމް ކުރުމާ ހަމައަށް އިނާޔަތުގެ ގޮތުގައި ލިބެމުން އައީ މާލީ އިނާޔަތުގެ ގޮތުގައި ލިބިވަޑައިގަންނަވާ 50،000 ރުފިޔާއައި ދިރިއުޅޭ ތަނުގެ ހަރަދުގެ ގޮތުގައި ލިބިވަޑައިގަންނަވާ 50،000 ރުފިޔާ ކަމަށެވެ.
ޔާމީންގެ ފަރާތުން އެދިފައިވަނީ 24 މަހަށް ލިބެންޖެހޭ ޖުމުލަ 2.4 މިލިއަން ރުފިޔާ ހޯއްދެވުމަށެވެ.
