ވެރިކަން ކުރާ މައި ޕާޓީ، އެމްޑީޕީގެ އެތެރޭގެ އިންތިހާބުގައި ވޯޓު ލެވޭ ފަރާތްތަކުގެ ދާއިމީ ލިސްޓު އާންމުކޮށްފިއެވެ.
މިއީ އަންނަ މެއި މަހުގެ 14 ވަނަ ދުވަހު ބޭއްވުމަށް ހަމަޖެހިފައިވާ އެޕާޓީގެ ޗެއަރޕާސަން، އަންހެނުންގެ ރޫހު އަދި ޒުވާނުންގެ ހިތްވަރުގެ އިންތިޚާބުގައި ވޯޓު ލެވޭނެ މީހުންގެ ލިސްޓެވެ.
އެމްޑީޕީގެ ވެބްސައިޓުގައި ވޯޓާސް ލިސްޓު އާންމުކޮށް، އެ ޕާޓީން ބުނެފައި ވަނީ މި ލިސްޓުގައި ނަން ހިމެނިފައި ނުވާ އެއްވެސް ފަރާތަކަށް ވޯޓު ނުލެވޭނެ ކަމަށެވެ.
މި ލިސްޓު އާންމުކޮށްފައިވަނީ މިދިޔަ މަހުގެ 22 ވަނަ ދުވަހު އާންމުކުރި ވަގުތީ ލިސްޓަށް ޝަކުވާ ހުށަހެޅި ފަރާތްތަކުގެ ޝަކުވާތައް ބަލާ، ގެންނަން ޖެހޭ ބަދަލުތައް ގެނައުމަށްފަހު ކަމަށްވެސް އެމްޑީޕީން ބުނެއެވެ.
