ވަޒީފާ އާ ބެހޭ ޓްރައިބިއުނަލްގެ މެންބަރުން ވިހެއުމުން ދޭ ދެ މަސް ދުވަހުގެ ޗުއްޓީ ހަ މަސް ދުވަހަށް އިތުރު ކޮށްފިއެވެ.
ޓްރައިބިއުނަލްގެ މެންބަރުންގެ ސުލޫކީ މިންގަނޑު ބަހައްޓަން ޖެހޭ ގޮތުގެ އުސޫލަށް ގެނައި އިސްލާހުގައިވާ ގޮތުން، ވިހެއުމާ ގުޅިގެން ދޭ ޗުއްޓީގެ ގޮތުގައި އެ އިދާރާގެ އަންހެން މުވައްޒަފުންނަށް ދެވޭނީ ހަ މަހުގެ ޗުއްޓީއެކެވެ.
މި އުސޫލަށް ގެނައި އިސްލާހު ގެޒެޓުގައި މިއަދު ޝާއިއުކުރުމުން، މި އަށް އަމަލުކުރަން ވަނީ ފަށައިފައެވެ.
ވަޒީފާ އާ ބެހޭ ޓްރައިބިއުނަލުން، އެ އިދާރާގެ އަންހެން މެންބަރުން ވިހެއުމާ ގުޅިގެން ދޭ ޗުއްޓީ އިތުރުކުރަން ނިންމާފައި ވަނީ، މިދިޔަ ފެބްރުއަރީ މަހުގެ ތެރޭގައި އެ ޓްރައިބިއުނަލްގެ މެންބަރު މަރިޔަމް ޝަމްއާ އިބްރާހީމް ވިހެއުމަށް ފަހު، ދެ މަސް ދުވަސް ނުވަނީސް ވަޒީފާ އަށް ނުކުންނަށް އެންގި މައްސަލަ ފެންމަތިވުމާ ގުޅިގެންނެވެ.
މާޗް 2019 އިން ފެށިގެން، ވިހެއުމާ ގުޅިގެން އަންހެން ސިވިލް ސާވަންޓުންނަށް މުސާރަ ލިބޭ ގޮތަށް ހަ މަހުގެ ޗުއްޓީ އެއް ދެއެވެ. އެކަމަކު ސަރުކާރުގެ ކުންފުނިތަކާއި މިނިވަން މުއައްސަސާތަކުގައި މަސައްކަތްކުރާ ބޯޑު މެންބަރުންނަށް ވިހެއުމާ ގުޅިގެން ދޭ ޗުއްޓީގެ މުއްދަތު ކަނޑައަޅަނީ އެ ތަންތަނުގެ ބޯޑު މެންބަރުންނެވެ.
