ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު، އެމަނިކުފާނުގެ އުފަންރަށް ޅ. ހިންނަވަރަށް ވަޑައިގެންފިއެވެ.
ރައީސް ޞާލިޙު، ހިންނަވަރަށް ވަޑައިގެންފައިވަނީ މިއަދު ހެނދުނުގެ ވަގުތެއްގައެވެ. އެމަނިކުފާނު ހިންނަވަރަށް ވަޑައިގަތުމުން، ރަށުގެ ރައްޔިތުން ވަނީ ހޫނު މަރުޚަބާއެއް ކިޔާފައެވެ. އެގޮތުން އެމަނިކުފާނަށް މަރުޚަބާ ކިޔުމަށާއި ސަލާމްކުރެއްވުމަށް ރަށުގެ ބަނދަރު ސަރަޙައްދަށް ގިނަ ޢަދަދެއްގެ ބަޔަކު އެއްވިއެވެ.
ރައީސުލްޖުމްހޫރިއްޔާގެ މި ދަތުރުފުޅަކީ ނުރަސްމީ ދަތުރުފުޅެކެވެ. މި ދަތުރުފުޅުގެ ތެރެއިން އެމަނިކުފާނު ވަނީ ރަށުގެ ރައްޔިތުންނާއި ބައްދަލުކުރައްވާއެވެ. މިއީ އަޟްޙާ ޢީދުގެ އުފަލުގައި ހިންނަވަރުގައި ކުރިއަށްގެންދާ ޙަރަކާތްތަކުގައި ބައިވެރިވެވަޑައިގަތުމަށް އެމަނިކުފާނު ކުރައްވާ ދަތުރުފުޅެކެވެ.
