ފޯކައިދޫ ބަނދަރު ތަރައްޤީ ކުރުމަށް މަޝްރޫޢު ފެށުމައްޓަކައި ބޭނުންވާ ސާމާނު އެ ރަށަށް ގެންގޮސްފިއެވެ. އެމްޓީސީސީން ބުނީ މި ތަކެތި އެ ރަށަށް ގެންގޮސްފައިވަނީ މިއަދު ކަމަށެވެ.
މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫޢުއަށް 55.97 މިލިއަން ރުފިޔާ ޙަރަދުވާނެ ކަމަށް ވަނީ ލަފާކޮށްފައެވެ. މި މަޝްރޫޢު އެމްޓީސީސީއާ ހަވާލުކޮށްފައިވަނީ 29 ޑިސެމްބަރ 2019 ގައެވެ.
މި މަޝްރޫޢުގެ ދަށުން 45،795 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމާއި، 507 މީޓަރުގެ ސަރަހައްދެއްގައި ބޭރުތޮށި ލުމާއި، 100 މީޓަރުގެ ސަރަޙައްދެއްގައި ރިވެޓްމަންޓް ޖެހުމާއި، 464 މީޓަރުގެ ސަރަޙައްދެއްގައި އެއްގަމު ތޮށި ލުމުގެ މަސައްކަތް ހިމެނޭއެވެ. އަދި 2320 އަކަ މީޓަރުގެ ސަރަހައްދެއްގައި ޕޭވްމަންޓް ހަދައި، ނެރު ބައްތި އާއި މަގު ބައްތި ޖެހުމުގެ މަސައްކަތް ހިމެކަމަށް އެމްޓީސީސީން ބުނެފައި ވެއެވެ.
