އިސްރާއީލު ފުލުހުން އަލްއަގްސާ މިސްކިތް ބަންދުކޮށްފިއެވެ.
އިސްރާއީލުން އިސްތިއުމާރު ކޮށްފައިވާ އިރުމަތީ ގުދުސްގައި ހުންނަ އަލްއަގްސާ މިސްކިތް ބަންދުކޮށް، މުސްލިމުން އެ މިސްކިތަށް ނަމާދަށް ދިއުން މިހާރު އެއްކޮށް މަނާކޮށްފައިވާ ކަމަށް، އަގްސާ މިސްކިތް ބަލަހައްޓާ އިސްލާމިކް ވަގްފް އޮފީހުން ބުނެފައި ވެއެވެ.
އަގްސާ މިސްކިތް މުސްލިމުންނަށް ބަންދުކުރި ނަމަވެސް، ޔަހޫދީ އަޅުވެރިންނަށް އަގްސާ މިސްކިތުގެ ގޯތިތެރެއަށް ވަދެ އެމީހުންގެ އަޅުކަން ފުރިހަމަ ކުރަން ފުރުސަތު ދެމުންދާ ކަމަށް، ފަލަސްތީނު ސަރުކާރުގެ ރަސްމީ ނޫސް އޭޖެންސީ، ވަފާއިން ބުނެއެވެ.
އިސްރާއީލުން އަގްސާ މިސްކިތް މުސްލިމުންނަށް ބަންދުކޮށް އަދި ޔަހޫދީންނަށް އަޅުކަން ކުރުމުގެ ފުރުސަތު ދިނީ، މިސްކިތާ ގުޅޭގޮތުން ވެފައިވާ އަހުދާ ޚިލާފަށް ކަމަށާއި، މިސްކިތާ ގުޅޭގޮތުން ވެފައިވާ އަހުދުނާމާގައި ބުނާގޮތުން އަގްސާ މިސްކިތުގައި އަޅުކަން ކުރެވޭނީ ހަމައެކަނި މުސްލިމުންނަށް ކަންވެސް ވަފާއިން ފާހަގަ ކޮށްފައި ވެއެވެ.
އަގްސާ މިސްކިތް މުސްލިމުންނަށް އެއްކޮށް ބަންދުކުރިއިރު، ހަމާސްއިން މިމަހުގެ ކުރީކޮޅު ޒަޔަނިސްޓު އިސްރާއީލާ ދެކޮޅަށް ވަރުގަދަ އޮޕަރޭޝަނެއް ފެށި އެއް ސަބަބު ކަމަށް ބުނެފައިވަނީ، އިސްރާއީލުން އަގްސާ މިސްކިތަށް ހަމަލާދިނުމާއި، މިސްކިތަށް ނަމާދަށްދާ މީހުންނަށް ހަމަލާދީ ހުރަސް އެޅުމާއި، މިސްކިތުގެ ހުރުމަތް ކެނޑުން ހުއްޓާނުލާ ކުރިއަށް ގެންދިއުމެވެ.
