މާލެ ސިޓީ ކައުންސިލްގެ މޭޔަރުކަމަށް އެމްޑީޕީގެ ފަރާތުން ވާދަ ކުރެއްވުމަށް އެމްޓީސީސީގެ ކުރީގެ ސީއީއޯ، އާދަމް އާޒިމް އިލެކްޝަންސް ކޮމިޝަން (އީސީ) އަށް ފޯމު ހުށަހަޅުއްވައިފި އެވެ.
މޭޔަރުކަމަށް އާޒިމް ފޯމު ހުށަހެޅުއްވިއިރު، އެމްޑީޕީގެ ފަރާތުން މެދު ހެންވޭރު ދާއިރާ އަށް ވާދަ ކުރަން ފޯމު ހުށަހެޅީ އަހުމަދު ރިޝްވާން ރަޝީދު އެވެ. ހެންވޭރު ދެކުނު ދާއިރާއަށް ހައްވާ ނިޙްލާ ވާދަކުރާއިރު މާފަންނު ދެކުނު ދާއިރާއަށް އަހުމަދު އިމްރާން ވެސް ވަނީ ފޯމު ހުށަހަޅައިފަ އެވެ.
މާލޭގެ މޭޔަރުގެ މަގާމް ހުސްވެފައިވަނީ އެ މަގާމުގައި ކުރިން ހުންނެވި ޑރ. މުހައްމަދު މުއިއްޒު ރިޔާސީ އިންތިހާބު ކާމިޔާބު ކުރައްވައި ރާއްޖޭގެ ރައީސުލްޖުމްހޫރިއްޔާ ކަމުގެ މަގާމާ ހަވާލުވެވަޑައިގަތުމުންނެވެ. މެމްބަރުންގެ ގޮނޑިތައް ހުސްވީ ސަރުކާރުގެ އެކި މަގާމުތަކަށް ވަޑައިގަތުމުންނެވެ.
މޭޔަރުގެ ގޮނޑިއަށް އާ ބޭފަޅަކު އިންތިހާބުކުރުމަށް ބާއްވާ ބައި އިލެކްޝަން ބޭއްވުމަށް އިލެކްޝަން ކޮމިޝަނުން ނިންމާފައި ވަނީ އަންނަ މަހުގެ 13 ގައެވެ.
