މާލޭގެ އިމާރާތެއްގެ މަތިން މިއަދު ވެއްޓުނު މީހާ މަރުވެއްޖެއެވެ.
މި ހާދިސާގައި މަރުވެފައި ވަނީ އިންޑިއާގެ އުމުރުން 20 އަހަރުގެ ފިރިހެނެކެވެ. އައިޖީއެމްއެޗްގެ މީޑިއާ އޮފިޝަލަކު މިއަދު ވިދާޅުވީ އެ ހޮސްޕިޓަލްގެ އިމަޖެންސީ ރޫމްގައި ފަރުވާ ދެމުން ދަނިކޮށް އެމީހާ 1:40 ހާއިރު މަރުވެފައިވާ ކަމުގެ މައުލޫމާތު ލިބިފައިވާ ކަމަށެވެ.
ޗާންދަނީ މަގުގައި ހުންނަ އެ އިމާރާތުގެ މަތިން އެމީހާ ވެއްޓުނީ އޭސީ މަރާމާތު ކުރަން ވެގެން ވައި ގޮޅިއަށް އަރާ އުޅެނިކޮށެވެ. ބިން މައްޗަށް ވެއްޓި، އޭނާގެ ހަށިގަނޑުގެ ގިނަ ތަންތަނަށް ގެއްލުން ލިބުނު އިރު، ބޮލަށް ވެސް ބޮޑެތި ޒަހަމްތަކެއް ލިބިފައިވާ ކަމަށްވެއެވެ.
ފުލުހުން ވިދާޅުވީ ޗާންދަނީ މަގުގައި ހުރި އިމާރާތެއްގެ މަތިން މީހަކު ވެއްޓިފައިވާ ކަމުގެ މައުލޫމާތު މިއަދު ހެނދުނު 10:30 ހާއިރު ފުލުހުންނަށް ލިބިފައިވާ ކަމަށެވެ. އެކަން ހިނގި ގޮތް ތަހުގީގު ކުރަމުން އަންނަ ކަމަށް ވެސް ފުލުހުން ވިދާޅުވިއެވެ.
