ހަނިމާދޫ ޕޮލިސް ސްޓޭޝަނާއި މެރެޓައިމް ޓްރެއިނިންގ އިންސްޓިޓިއުޓް ގުޅިގެން ހދ.ހަނިމާދޫގައި ކުރިއަށް ގެންދިޔަ ނިޔަމިކަމުގެ ސަނަދު 2 ގެ ކޯހުގެ ނިމުން ރޭ ފާހަގަ ކޮށްފިއެވެ.
ޖުމުލަ 28 ބައިވެރިންނާއިއެކު މިކޯސް ކުރިއަށް ގެންގޮސްފައިވަނީ ފެބުރުވަރީ 5 ވަނަ ދުވަހުން ފެށިގެން 7 ވަނަ ދުވަހުގެ ނިޔަލަށެވެ.
ކޯހުގެ ނިންމުމުގެ ރަސްމިއްޔާތު ޝަރަފުވެރި ކޮށްދެވީ ހަނިމާދޫ ކައުންސިލްގެ ރައީސް ޢަބުދުލް ސައްތާރު ހަސަނެވެ. އަދި ބައިވެރިންނަށް ސެޓްފިކެޓް ބައްސަވައިދެއްވީ އެމަނިކުފާނާއި މެރެޓައިމް ޓްރެއިނިންގ އިންސްޓިޓިއުޓްގެ ޗެއަރމަން މުޙައްމަދު އަސްލަމެވެ.
މިޖަލުސާގައި ހދ.އަތޮޅު ކޮމާންޑަރ ސްޕްރިންޓެންޑެންޓް އޮޕް ޕޮލިސް ރަޙްމާ ސަޢީދު ބައިވެރި ވެލެއްވިއެވެ. އަދި މިކޯސް ހިންގުމަށް އެހީތެރިވެދެއްވި ފަރާތްތަކުގެ އަގުވަޒަން ކުރުމުގެ ގޮތުން އެކަމަނާވަނީ ހަދާނީ ފިލާ ހަވާލު ކޮށްދީފައެވެ.
މިކޯހުގައި ކިޔަވައިދެއްވަނީ ނިޔަމިކަމުގެ ދާއިރާއިން ތަޢުލީމާއި ތަމްރީނާއި އަދި ތަޖުރިބާ ހޯއްދަވާފައިވާ މެރެޓައިމް ޓްރެއިނިންގ އިންސްޓިޓިއުޓްގެ ބޭފުޅުންނެވެ.
މި ކޯހުގައި އުނގަންނައި ދެވުނު ބައިތަކުގެ ތެރޭގައި، ނެވިގޭޝަން، ކޮމިޔުނިކޭޝަން، ކަނޑުމަތީގެ ސަލާމަތާއި ރައްކާތެރިކަން، ޞިއްޙީ ފުރަތަމައެހީ، ކަނޑުގެ ޤާނޫނާއި ޤަވާއިދު އަދި ޗާޓް ވޯކްސް ހިމެނޭ ކަމަށް ހަނިމާދޫ ޕޮލިސް ސްޓޭޝަނުން މައުލޫމާތު ދެއްވައެވެ.
