ރައްޔިތުންގެ މަޖިލިސް އިންތިހާބަށް އިލެކްޝަން ކޮމިޝަން (އީސީ) އިން ކައުންޓްޑައުން ފަށައިފި އެވެ
ވިހި ވަނަ މަޖިލިސް އިންތިހާބު ބާއްވަން ކޮމިޝަނުން ނިންމާފައި އޮތީ އަންނަ މަހުގެ 17 ގަ އެވެ. އެއީ ރޯދަ މަހުގެ 7 ވަނަ ދުވަހެވެ. މި އަހަރުގެ ރޯދަ މަސް ފެށެނީ އަންނަ މަހުގެ 11 ގަ އެވެ.
އީސީން މިއަދު ބުނީ އިންތިހާބަށް މިހާރު އޮތީ މިއަދުން ފެށިގެން 20 ދުވަސް ކަމަށެވެ.
މަޖިލިސް އިންތިހާބު ރޯދަ ބާއްވަން ނިންމާފައި ވަނިކޮށް ރައްޔިތުންގެ މަޖިލީހުން އޮތީ އިންތިހާބު ރޯދައިގެ 10 ދުވަސް ފަހުން ބާއްވަން ފާސްކޮށްފަ އެވެ. އެކަމަކު އެ އިސްލާހު ރައީސް ޑރ. މުހައްމަދު މުއިއްޒު ތަސްދީގެއް ނުކުރައްވަ އެވެ. ރައިސް މިހާރު އެކި ޕްލެޓްފޯމްތަކުގައި ދައްކަމުން ގެންދަވާ ވާހަތަކަށް ބަލާ އިރު، އެ އިސްލާހު ތަސްދީގެއް ނުކުރައްވާނެ އެވެ. އެހެންވެ މަޖިލިސް އިންތިހާބު އޮންނާނީ އަންނަ މަހުގެ 17 ގައި ކަމަށް އެ މަނިކުފާނުގެ ވާހަކަތަކުގައި ވެސް ގެންދަވަނީ ވިދާޅުވަމުންނެވެ.
މިދިޔަ ހަފުތާގައި އިދިކޮޅު އެމްޑީޕީން ވަނީ އިންތިހާބު ރޯދަ މަހު ބާއްވާ ނަމަ އީސީގެ މެންބަރުން މަގާމުން ވަކިކުރަން ހުށަހަޅާނެކަމުގެ އިންޒާރު ވެސް ދީފަ އެވެ.
މަޖިލިސް އިންތިހާބުގައި 368 ކެންޑިޑޭޓަކު ވާދަކުރާ އިރު، މެންބަރުން ހޮވަނީ 93 ދާއިރާއަކަށެވެ.
