ދަރިވަރަކު ބްލެކްމެއިލްކުރި ކަމަށް ބުނާ ފުލުހެއްގެ މައްސަލަ ބަލަން ފަށާފައިވާ ކަމަށް ދިވެހި ފުލުހުންގެ ޚިދުމަތުން މިއަދު ބުނެފިއެވެ.
އާންމު ރައްޔިތަކު ސޯޝަލްމީޑިއާގައި ކުރި ޕޯސްޓެއްގައިވަނީ ދިވެހި ފުލުހުންގެ އިންސްޕެކްޓަރަކު، ވިލާ ކޮލެޖްގައި ނާސިން ކިޔަވާ ދަރިވަރަކު ބްލެކްމެއިލްކޮށް ފައިސާ ހޯދަން މަސައްކަތް ކުރި ކަމަށް ތުހުމަތުކޮށް، މި މައްސަލަ ބެލޭނެ ވެރިއަކު ނޫނީ އިދާރާއެއް އެބަހުރިތޯ ސުވާލުކޮށްފައެވެ.
މިކަމާ ގުޅިގެން ފުލުހުންގެ ޚިދުމަތުގެ ތަރުޖަމާނު އަޙުމަދު ޝިފާން ”އެކްސް” ގައި ކުރެއްވި ޕޯސްޓެއްގައިވަނީ ފުލުހުންނާމެދު ކުރެވޭ ޝަކުވާތައް ތަހުގީގުކުރާ ބަހާއިން މި މައުލޫމާތު ޔަގީންކޮށް މިކަން ބެލުމުގެ މަސައްކަތް ކުރަމުންދާ ކަމަށެވެ.
ފުލުހަކާމެދު ޝަކުވާއެއްވާނަމަ ސީދާ ފުލުހުންނަށް އެކަމެއް ހުށަހަޅުއްވައިގެން ހައްލުކުރެއްވުމަށް ވެސް ޝިފާން ވަނީ އެދިވަޑައިގެންފައެވެ.
