މާލޭގެ ކެފޭއެއްގެ ބަދިގޭގެ ދުން ހޮޅިން ބަދިގެތެރެއަށް ދުން ލީކުވެ 7 މީހަކު އަނބުރައިގަނެގެން ހޮސްޕިޓަލަށް ގެންގޮސްފިއެވެ.
ފުލުހުން މިއަދު ބުނެފައިވަނީ، ބޮޑުރަސްގެފާނު މަގުގައި ހުރި ކެފޭއެއްގެ ބަދިގޭ ދުންހޮޅިން ބަދިގެތެރެއަށް ދުން ލީކުވެ 7 މީހަކު އަނބުރައިގަނެގެން އައިޖީއެމް ހޮސްޕިޓަލަށް ގެންގޮސްފައިވާ ކަމަށެވެ. މި ހާދިސާގެ ރިޕޯޓް ފުލުހުންނަށް ލިބިފައިވަނީ މިއަދު 05:50 ގައި ކަމަށްވެސް ފުލުހުން މައުލޫމާތު ދީފައިވެއެވެ.
މި މީހުންގެ ތެރޭގައި ހިމެނެނީ ސްރީލަންކާގެ ރައްޔިތަކާއި އިންޑިއާގެ ރައްޔިތެއްގެ އިތުރުން، ބަންގްލަދޭޝްގެ 2 މީހުން އަދި ނޭޕާލްގެ 3 މީހުންނެވެ. ފުލުހުން ބުނެފައިވަނީ މި މީހުންގެ ތެރެއިން އެކަކަށް މިހާރު ފަރުވާދެނީ އޭޑީކޭގައި ކަމަށެވެ. އަދި އެއްވެސް މީހެއްގެ ހާލު ސީރިއަސް ނޫން ކަމަށްވެސް ހޮސްޕިޓަލުން މައުލޫމާތު ދީފައިވާ ކަމަށްވެސް ފުލުހުން ބުނެފައިވެއެވެ.
ފުލުހުން ބުނެފައިވަނީ މި ހާދިސާއާ ގުޅިގެން ބަލަންޖެހޭ ކަންކަން ބަލަމުންދާ ކަމަށެވެ.
