ވެލާނާ އިންޓަނޭޝަނަލް އެއާޕޯޓް ތަރައްގީ ކުރުމަށާއި ރާއްޖޭގެ ސިއްހީ ދާއިރާ ތަރައްގީ ކުރުމަށް ސައުދީ ފަންޑުން ރާއްޖެ އަށް 150 މިލިއަން ޑޮލަރުގެ ލޯނެއް ދީފި އެވެ.
ފިނޭންސް މިނިސްޓްރީގައި ބޭއްވި ރަސްމިއްޔާތުގައި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ފިނޭންސް މިނިސްޓަރު ޑރ. މުހައްމަދު ޝަފީގު އެވެ. ސައުދީ ފަންޑުގެ ފަރާތުން ސޮއިކުރެއްވީ ސައުދީ ފަންޑުގެ ވެރިޔާ ސުލްތޯން އަލްމަރްޝާދު އެވެ.
ސައޫދީ ފަންޑުން ރާއްޖެ އަށް މިއަދު ދީފައިވަނީ ދެ ލޯނެވެ. އެއީ ވީއައިއޭ ތަރައްގީ ކުރުމުގެ މަސައްކަތްތަށް ދިން 100 މިލިއަން ޑޮލަރުގެ ލޯނެއްގެ އިތުރުން ސިއްހީ ދާއިރާ ތަރައްގީ ކުރަން ދިން 50 މިލިއަން ޑޮލަރުގެ ލޯނެކެވެ.
މި ރަސްމިއްޔާތުގައި ވާހަކަފުޅު ދައްކަވަމުން ސައުދީ ފަންޑުގެ ސީއީއޯ ވިދާޅުވީ ވެލާނާ އެއާޕޯޓު ތަރައްޤީކުރުމަށް ދިން 100 މިލިއަން ޑޮލަރުގެ ލޯނު އެހީއަކީ މީގެކުރިން ފޯރުކޮށްދީފައިވާ އެހީއަށް އިތުރުކޮށްދޭ އެހީއެއް ކަމަށެވެ. މި އެހީއާއެކު ހަތް މިލިއަން ފަސިންޖަރުންގެ އެއާޕޯޓެއް ނިންމަން ސަރުކާރުން ކުރަމުންދާ މަސައްކަތްތަށް ބޮޑު އެހީތެރިކަމަކަށް ވެގެންދާނެ ކަމަށް ވިދާޅުވި އެވެ.
އަދި ސިއްހީ ދާއިރާ ތަަރައްޤީކުރުމަށް ދިން އެހީއަކީ ރާއްޖޭގެ ރަށްރަށުގައި ފޯރުކޮށްދޭ ސިއްހީ ހިދުމަތުގެ ފެންވަރު ރަނގަޅުކުރުމަށް ފޯރުކޮށްދޭ އެހީއެއް ކަމަށް ވިދާޅުވި އެވެ.
