ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އެމަނިކުފާނަށް ހާއްސަ ކޮށްފައިވާ ރަސްމީ ގެކޮޅު ކަމަށްވާ މުރައިދޫގެއަށް ދިރިއުޅުން ބަދަލު ކުރައްވައިފި އެވެ.
މަޖިލީހުގެ އިދާރާ އިން ބުނިގޮތުގައި މަޖިލީހުގެ ރައީސް މުރައިދޫގެއަށް ބަދަލުވެވަޑައިގެންފައިވަނީ އިއްޔެ އެވެ. މުރައިދޫގެއަށް އަބްދުއްރަހީމް ބަދަލުވެވަޑައިގަތުމަށް އެ ތަން ވަނީ މަރާމާތު ވެސް ކޮށްފަ އެވެ.
މިދިޔަ މެއި މަހު މަޖިލީހުގެ ރައީސްގެ މަގާމާ ހަވާލުވެވަޑައިގަތް، އަބްދުއްރަހީމް މީގެކުރިން ދިރިއުޅުއްވަމުން ގެންދެވީ އޭނާގެ އަމިއްލަ ގެކޮޅުގަ އެވެ.
އަބްދުއްރަހީމް ވަނީ މުރައިދޫގޭގެ ބައެއް މަގާމުތަކަށް ބަދަލު ގެންނަން ރައްޔިތުންގެ މަޖިލީހަށް ހުށަހަޅައިފަ އެވެ. އަބްދުއްރަހީމް ހުށަހެޅުއްވީ މުރައިދޫގޭގެ އެއް މަގާމެއްގެ ނަން ބަދަލުކޮށް، ހަތަރު މަގާމެއް އުވާލުމަށް ފަހު، އެ މަގާމުތަކުގެ ބަދަލުގައި ހަތަރު މަގާމެއް އުފެއްދުމުގެ ހުއްދައަށެވެ.
އެ ހުއްދަ ރައްޔިތުންގެ މަޖިލީހުގެ އާންމު ކޮމިޓީ އިން މިދިޔަ ބުދަ ދުވަހު ވަނީ ދީފަ އެވެ.
މުރައިދޫ ގެއަކީ މެއި 6، 2021 ގައި ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާއަށް ފަހު ސަލާމަތީ ގޮތުން ބަލަން ޖެހޭ ކަންކަމާ ގުޅިގެން މަޖިލީހުގެ ރައީސުން ދިރިއުޅުއްވުމަށް ދައުލަތުން ހާއްސަ ކުރި ގެއެކެވެ.
ބޮމުގެ ހަމަލާއަށް ފަހު ނަޝީދު މުރައިދޫ ގޭގައި ދިރިއުޅުއްވި ނަމަވެސް ނަޝީދަށް ފަހު މަޖިލީހުގެ ރައީސްގެ މަގާމު އެންމެ ފަހުން އަދާ ކުރެއްވި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް އެ ގޭގައި ދިރި ނޫޅުއްވަ އެވެ.
