ޖަޕާން އިންޓަނޭޝަނަލް ކޯޕަރޭޝަން ސެންޓަރ (ޖައިސް)އިން ޖަޕަނީސް ގްރޭންޓް އެއިޑް އިން މޯލްޑިވްސް (ޖޭޑީއެސް)ގެ ދަށުން މި އަހަރަށް ޖަޕާން ސަރުކާރުން ދިނުމަށް ހަމަޖެހިފައިވާ ސްކޮލަރޝިޕްގެ ފުރުސަތުތުތަކަށް 1.02 މިލިއަން ޑޮލަރުގެ ހިލޭ އެހީ ރާއްޖެއަށް ދިނުމަށް ސޮއިކޮށްފިއެެވެ.
މިއީ ޖަޕާންގެ ސަރުކާރުގެ ހިލޭ އެހީގެ ދަށުން ދިވެހި ސަރުކާރުގެ މުވައްޒަފުންނަށް ދޭ ސްކޮލާޝިޕް ފުރުސަތެކެވެ.
ހާރިޖީ ވުޒާރާގައި މިއަދު ބޭއްވި ރަސްމިއްޔާތެއްގައި އެކްސްޗޭންޖް އޮފް ނޯޓްސްގައި ދިވެހި ސަރުކާރުގެ ފަރާތުން ސޮއި ކުރެއްވީ ހާރިޖީ ވަޒީރު މޫސާ ޒަމީރެވެ. ޖަޕާން ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު މިސް ޓަކޭޗީ މިޑޯރީއެވެ.
މި ހިލޭ އެހީގެ ދަށުން ރާއްޖޭގެ ހިއުމަން ރިސޯސް ޑިވެލޮޕްމަންޓް އިތުރަށް ކުރިއެރުވުމަށް ޖަޕާން ސަރުކާރުން 2020 ވަނަ އަހަރުގެ އޮގަސްޓް މަހުން ފެށިގެން ހިންގަމުންދާ އެ ޕްރޮޖެކްޓްގެ ދަށުން ދިވެހި ދަރިވަރުންނަށް މިއަހަރު އަނެއްކާވެސް 6 ސްކޮލަރޝިޕް ދޭނެއެވެ.
2020 ވަނަ އަހަރުން ފެށިގެން ޖޭޑީއެސް އިން ދެމުން އަންނަ މި ސްކޮލަރޝިޕްތަކުގައި މިހާރުވެސް ގިނަ އަދަދެއްގެ ދަރިވަރުން ޖަޕާނުގައި ކިޔަވަމުން ދެއެވެ. އަދި ސްކޮލާޝިޕްގެ ދަށުން ކިޔަވައިގެން އެނބުރި ރާއްޖެއަށް ހިދުމަތް ކުރުމަށް ބައެއް ފަރާތްތަކުން ނުކުމެފައި ވެއެވެ.
