ނ. މަގޫދޫގައި ޕްލާސްޓިކް ބޭނުންކުރާ މިންވަރު މަދުކޮށް ފޮތި ނެޕީ ބޭނުންކުރުމަށް ބާރުއަޅާ ތުއްތު ކުދިންނާއި އެކުދިންގެ އާއިލާތަކަށް އަމާޒުކޮށްގެން “ބުޑު ފޮތި”ގެ ނަމުގައި ޕްރޮގްރާމެއް ފަށައިފިއެވެ.
ބުޑުފޮތި ޕްރޮގްރާމަކީ މަގޫދޫގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި، ރަށު ކައުންސިލާއި، ސިއްޙީ މަރުކަޒުގެ އިސްނެގުމާއެކު، ސޮނެވާ ނަމޫނާގެ އެހީތެރިކަމާއެކު ހިންގާ ޕްރޮގްރާމެކެވެ.
މި ޕްރޮގްރާމްގެ މައިގަނޑު މަޤްޞަދަކީ ރަށުގައި އުފެދޭ ނެޕީ ކުނި މަދުކޮށް، ރަށަށް އެތެރެ ކުރެވޭ ޑިސްޕޯޒަބަލް ނުވަތަ އެއްފަހަރު ބޭނުންކޮށްފައި އެއްލައިލާ ނެޕީ މަދުކޮށް، މުޖުތަމަޢުގައި ރީޔުސަބަލް ނެޕީ ބޭނުންކުރުމުގެ ސަޤާފަތެއް އާލާކުރުމެވެ.
ތިން މަސް ދުވަހަށް ކުރިއަށް ގެންދާ މި ޕްރޮގްރާމުގައި ރަށުގައި މިވަގުތު ތިބި ނެޕީ ޖަހާ ހުރިހާ ކުދިންނާއި އެކުދިންގެ އާއިލާތައް ހިމެނޭ ގޮތައް ޖުމްލަ 32 އާއިލާއިން މި ޕްރޮގްރާމުގައި ބައިވެރިވެއެވެ.
މި ޕުރޮގްރާމް ލޯންޗްކުރުމަށް ބޭއްވި ހަރަކާތުގައި ކޮންމެ އާއިލާއަކަށްވެސް ރީޔުސަބަލް ނެޕީ ކިޓެއް ހަވާލުކޮށް އެކިޓް ބޭނުންކުރާނެ ގޮތުގެ މަޢުލާމޫތު ވަނީ ފޯރުކޮށްދީފައެވެ.
އަދި ދަރިންނަށް ރައްކާތެރި ސިއްޙަތާއި ވެއްޓެއް ކަށަވަރުކުރުމަށް މަސައްކަތްކޮށް އެކަމަށް ބާރުއަޅާ އާދަތައް އިސްކުރުމަށް އެއްބަސްވެ ޕްލެޖެއްގައި ޕްރޮގްރާމްގެ ބައިވެރިން ވަނީ ސޮއި ކޮށްފައެވެ. މީގެ އިތުރުން، މި ރީޔުސަބަލް ނެޕީ ޓްރައިލްއަކީ ކާމިޔާބު ޕްރޮގްރާމަކަށް ހެދުމަށްޓަކައި ބައިވެރިވާ މެންބަރުން ހިމެނޭ ސަޕޯޓް ގްރޫޕެއް މި އިވެންޓްގައި ވަނީ އިފްތިތާހް ކޮށްފައެވެ.
މި ގްރޫޕްގެ ބޭނުމަކީ ބައިވެރިންގެ ރީޔުސަބަލް ނެޕީގެ ތަޖުރިބާ އެހެން ބައިވެރިންނާ ހިއްސާކޮށް، އެކަކު އަނަކަކުގެ ކިބައިން ދަސްކޮށް އެހީތެރިކަން ފޯރުކޮށްދޭނެ ފުރުސަތު ފަހިކުރުން ކަމަށް އެ ރަށު ކައުންސިލުން ވަނީ ބުނެފައެވެ.
ބުޑު ފޮތި ޕްރޮގުރާމު ފެށީ އެއްފަހަރު ބޭނުންކޮށްފައި އެއްލާލާ ނެޕީ ބޭނުންކުރާ ގޮތާ ގުޅޭ ގޮތުން މަގޫދޫގައި ސާވޭއެއް ކުރިއަށް ގެންދިޔުމަށް ފަހު އެވެ. އެ ސާވޭއިން ދައްކާ ގޮތުން މަހެއްގެ މައްޗަށް އެއްފަހަރު ބޭނުން ކޮށްފައި އުކާލާ ނެޕީ ގަތުމަށް ތުއްތު ކުއްޖަކު ބަލާ އާއިލާއަކުން މަހަކު 831ރ. ހަރަދު ކުރެ އެވެ. އެއީ ތިން އަހަރު ދުވަހަށް ބަލާނަމަ 30،000ރ. އެވެ.
