ފުލުހުންގެ ތަރުޖަމާނު އަހުމަދު ޝިފާން ވިދާޅުވީ، ނ ހެނބަދޫގައި ހަރަކާތްތެރިވާ ފުލުހެއްގެ ސައިކަލުގައި އަލިފާން ރޯކޮށް، އަންދާލާފައި ވަނީ ރޭ ދަންވަރުގެ ވަގުތެއްގައި ކަމަށެވެ. އަދި އިއްޔެ އެރަށުގައި ހަރަކާތްތެރިވި އެހެން ފުލުހެއްގެ ސައިކަލަށްވެސް ބަޔަކު ގެއްލުން ދިންކަމަށް ޝިފާން ވިދާޅުވިއެވެ.
ޝިފާން ވިދާޅުވީ، މިއީ ނ. އަތޮޅުގައި ފުލުހުން ކުރިއަށްގެންދާ މަސްތުވާތަކެތީގެ އޮޕަރޭޝަނަކާ ދެކޮޅަށް ބަޔަކު ކުރި ކަމެއްކަމަށް ތުހުމަތުކުރެވޭ ކަމަށެވެ. ފުލުހުންގެ ސައިކަލުތަކަށް ގެއްލުން ދީފައި ވަނީ މި އޮޕަރޭޝަނުގައި ތުހުމަތު ކުރެވޭ ބައެއްކަމަށް ބެލެވޭކަމަށްވެސް ޝިފާން ވިދާޅުވިއެވެ.
ޝިފާން ވިދާޅުވީ މިފަދަ ފިނޑި އަމަލެއްގެ ސަބަބުން ފުލުހުންގެ ހިތްވަރާއި ސާބިތުކަމަށް ކުޑަވެސް ބަދަލެއް ނާންނާނެ ކަމަށާއި، އެފަދަ އަމަލުތައް ހިންގާ ފަރާތްތަކަށް އެކަން ހަނދާންކޮށްދޭ ކަމަށެވެ.
