ރާއްޖޭގައި މުޅިން އަލަށް ހުޅުވުމަށް މަސައްކަތް ކުރަމުންދާ ޑިވެލޮޕްމެންޓް ބޭންގެ ސީއީއޯގެ މަގާމަށް ދެމީހެއްގެ ނަން ލިބިފައިވާ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
ނަމަވެސް އެއީ ކޮން ދެބޭފުޅުންނެއްގެ ނަމެއް ކަމެއް މިނިސްޓަރު ހާމަކުރައްވާފައެއް ނުވެއެވެ. ބޭންކުގެ މަތީ ފަޑިއާއި ގުޅޭ ގޮތުން މިނިސްޓަރު އިތުރަށް ވިދާޅުވީ ބޭންކްގެ ގަވަނިން ބޯޑުގައި ސަރަހައްދީ ފެންވަރު ފާހަގަކޮށްލެވޭ ފަރާތްތަކެއް ތިބޭނެ ކަމަށެވެ.
މި ބޭންކަށް ބޭނުންވާ ލައިސަންސް ހޯދުމަށް ޖުލައި 28 ވަނަ ދުވަހު އިކޮނޮމިކް މިނިސްޓްރީން ވަނީ އެމްއެމްއޭއަށް ހުށަހަޅާފައެވެ. ލައިސަންސް ދޫކުރުމާއި ނުކުރުމުގެ އިޚްތިޔާރު އޮންނަނީ އެމްއެމްއޭއަށެވެ.
ޑިވެލޮޕްމެންޓް ބޭންކު އުފައްދަނީ ސަރުކާރުގެ ސައްތައިން ސައްތަ ހިއްސާ އޮންނަ ކުންފުންޏެއް މެދުވެރިކޮށެވެ. ރައީސް އޮފީހުން ބުނެފައިވާ ގޮތުގައި މި ބޭންކުގެ މައިގަނޑު މަގްސަދަކީ ދެމެހެއްޓެނިވި އިގުތިސާދީ އަދި އިޖުތިމާޢީ ތަރައްގީއަށް އިންވެސްޓުކުރުމާއި، އުމްރާނީ ތަރައްގީއަށް ބޭނުންވާ ފައިސާ ހޯދުމެވެ.
އޭގެ އިތުރުން، ޕީއެސްއައިޕީ މަޝްރޫއުތަކަށް ފައިސާ ދިނުމުގައި ދިމާވާ ގޮންޖެހުންތައް ހައްލުކުރުމާއި، ރާއްޖޭގެ ބޭންކިން ނިޒާމުގައި ބޭރު ފައިސާ ބެހެއްޓުމުގެ ޝައުގުވެރިކަން އިތުރުކުރުން ހިމެނޭ ކަމަށް ވެސް ސަރުކާރުން ހާމަކޮށްފައިވެއެވެ.
ރައީސުލްޖުމްހޫރިއްޔާއަށް ލިބިފައިވާ ބާރުގެ ދަށުން، މި ބޭންކު އުފެއްދެވުމަށް ނިންމެވީ މިދިޔަ މެއި މަހުގެ 16 ވަނަ ދުވަހުއެވެ. އަދި ސަރުކާރުގެ އަމާޒަކީ އޮގަސްޓް މަހުގެ ތެރޭގައި މި ބޭންކު ހުޅުވުން ކަމަށް މިނިސްޓަރ ސައީދު ވަނީ ވިދާޅުވެފައެވެ.
