ދިވެހިރާއްޖެއާއި އިންޑިޔާއާ ދެޤައުމުގެ ދެމެދުގައި އޮތް ތާރީޚީ އަދި ގާތް ގުޅުން އިތުރަށް ބަދަހިކުރެއްވުމަށް މި ސަރުކާރުން ފުރިހަމަ އަށް މަސައްކަތް ކުރައްވާނެކަމުގެ ޔަޤީންކަން ރައީސް ޑރ މުޙަންމަދު މުޢިއްޒު ދެއްވައިފި އެވެ.
އެމަނިކުފާނު މިފަދައިން ވިދާޅުވީ އިންޑިއާގެ އެގްޒިމް ބޭންކް މެދުވެރިކޮށް އިންޑިއާ ސަރުކާރުގެ ލައިން އޮފް ކްރެޑިޓް ފެސިލިޓީގެ ހިލޭ އެހީގެ ދަށުން ރާއްޖޭގެ 28 ރަށެއްގެ ފެނާއި ނަރުދަމާގެ މަސައްކަތް ނިންމުމަށް މިއަދު ރައީސް އޮފީހުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސްގެ ވާހަކަފުޅުގައި، އިންޑިޔާއަކީ އަބަދުވެސް ރާއްޖޭގެ އެންމެ ގާތް އެކިވެރިޔާކަމަށާއި ރާއްޖެއަށް ބޭނުންވާ ކޮންމެ ހިނދެއްގައި އެހީތެރިކަން ފޯރުކޮށްދޭ ޤައުމެއްކަމުގައި ވިދާޅުވިއެވެ. އަދި ރާއްޖޭގެ އިންފްރާސްޓްރަކްޗަރ ތަރައްޤީކުރުމަށް އިންޑީއާއިން ދޭ އެހީތެރިކަމުގެ ސަަބުން ރާއްޖެއަށް އިޤްތިޞާދީ ގޮތުން ބޮޑެތި ފައިދާތަކެއް ލިބި، ރާއްޖޭގެ އިޤްތިޞާދު ކުރިއަރައި، ޤައުމުގެ ކުރިއެރުމަށް މަގުފަހިވެގެންދާނެކަމުގައި ވިދާޅުވިއެވެ. އަދި މި މަޝްރޫޢުތަކަކީ ރާއްޖެއާއި އިންޑިޔާއާ ދެމެދު އޮންނަ ގުޅުމުގައި ފާހަގަކޮށްލެވޭ މުހިންމު މަޝްރޫޢުތަކެއް ކަމަށްވެސް ވިދާޅުވިއެވެ.
ރައީސްގެ ވާހަކަފުޅުގައި، އިންޑިޔާގެ ހިލޭ އެހީގެ ދަށުން ހިންގާ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްތަކަކީ، އިޤްތިޞާދީ އަދި އިޤްތިޞާދީ ތަރައްޤީގައި ދެޤައުމުގެ ގާތް ގުޅުން ދައްކުވައިދޭ މަޝްރޫޢުތަކެއްކަން ފާހަގަކުރެއްވިއެވެ. އަދި މި މަސައްކަތުގެ ދަށުން އިންގިލާބީ ގިނަ މަސައްކަތްތަކެއް މިހާރު ކުރިއަށްދާ ކަމަށާއި، އެ ކަންކަން މުޖުތަމައުތަކަށް ފޯރުކޮށްދިނުން އަވަސް ކުރުމުގެ ވިސްނުން ގެންގުޅުއްވާ ކަމަށް ވިދާޅުވި އެވެ. އަދި ލައިން އޮފް ކްރެޑިޓް އެރޭންޖްމަންޓް ރީސްޓްރަކްޗަރ ކުރުމުގައި ލިބޭ ލުއިފަސޭހަކަމަށް ޝުކުރު އަދާކުރެއްވިއެވެ.
ރައީސް ވަނީ އިންޑިޔާގެ ބޮޑުވަޒީރު ނަރެންދުރަ މޯދީއަށާއި، ސަރުކާރަށާއި، ރަޙުމަތްތެރި ރައްޔިތުން ރާއްޖެއަށް ވެދެއްވަމުން ގެންދަވާ ދީލަތި އަދި ދެމެހެއްޓެނިވި އެހީތެރިކަމަށްޓަކައި ޝުކުރު އަދާކުރައްވާފައި އެވެ. އަދި، މޯދީ ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށް އިންޑިއާއަށް ކުރެއްވި ދަތުރުފުޅުގެ ހަނދާން އާކުރައްވައި، އިންޑިޔާގެ ބޮޑުވަޒީރާއި، އިންޑިޔާގެ ރައީސް ހަރ އެކްސެލެންސީ ޑްރޯޕަދީ މުރްމޫއާ ބައްދަލުކުރެއްވުމަށް ދެއްވި ދައުވަތާއި ފުރުޞަތު ފާހަގަކުރައްވައި، އެކަމަށް ޝުކުރު އަދާކުރެއްވިއެވެ.
ވާހަކަފުޅު ނިންމަވާލައްވަމުން ރައީސް، ޒަމާނުއްސުރެ ދެޤައުމުގެ ދެމެދުގައި އުފެދިފައިވާ ގާތްގުޅުމުގެ ސަބަބުން، ރާއްޖެއާއި އިންޑިޔާއާ ދެޤައުމުގެ ދެމެދުގައި އޮތް ގާތް ގުޅުމަށް އިތުރު ކުރިއެރުމެއް ލިބިގެންގޮސްފައިވާކަން ފާހަގަކުރެއްވިއެވެ. އަދި އިންޑިޔާގެ ރައްޔިތުންނާ އެކު އޮންނަ ގާތް އަދި ތާރީޚީ ގުޅުމުގެ އަގު ދިވެހިން ވަޒަންކުރާ ކަމަށާއި، އެ ގުޅުން ދެމެހެއްޓުމަށާއި ކުރިއެރުވުމަށް ދިވެހިން މަސައްކަތް ކުރާ ކަމަށް ރައީސް ވިދާޅުވިއެވެ.
އަދި ކުރިއަށް އޮތް އަހަރުތަކުގައި ރާއްޖެއާއި އިންޑިޔާއާ ދެޤައުމުގެ ދެމެދުގައި އޮތް ގުޅުން އިތުރަށް ބަދަހިވެގެންދާނެ ކަމަށް އުންމީދު ކުރައްވާ ކަމުގައި ރައީސް ވިދާޅުވިއެވެ.
