އިންޑިޔާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން އައްޑޫ ސިޓީގައި ކުރިޔަށްގެންދިޔަ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއު ނިންމާ ސަރުކާރާ ހަވާލުކޮށްފިއެވެ.
އައްޑޫގައި ޒަމާނީ ފެންވަރަށް މަގުތައް ހެދުމަށް ހަވާލުކޮށްފައިވަނީ އެފްކޮންސް އާއެވެ. އެއީ ފެބްރުއަރީ 21، 2021 ގައެވެ. އައްޑޫގެ ގޮނޑުދޮށް ހިމާޔަތްކުރުމާއި ބިންހިކުމަށް ހަވާލުކޮށްފައިވަނީ އިންޑިޔާގެ ވެންއޫޑު އިންޑިޔާ ޕްރައިވެޓް ލިމިޓެޑާއެވެ. އެއީ މަރޗް 27، 2022 ގައެވެ.
މި މަޝްރޫއުތައް ނިންމައި ދިވެހި ސަރުކާރާ މިއަދު ހަވާލުކުރީ އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމަނިއަމް ޖަައިޝަންކަރު ރާއްޖެ އަށް މިހާރު ކުރައްވަމުން ގެންދަވާ ރަސްމީ ދަތުރުގައި އައްޑު އަށް ވަޑައިގެން ބޭއްވި ހާއްސަ ރަސްމިއްޔާތެއްގައެވެ.
އައްޑޫ ސިޓީ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫޢުގެ ތެރެއިން ޖުމްލަ 184.3 ހެކްޓަރުގެ ބިން ހިއްކާފައިވެއެވެ. މިގޮތުން ހިތަދޫގެ ދެ ސަރަަހައްދެއް ހިމެނޭހެން 80 ހެކްޓަރ، މަރަދޫ އަދި މަރަދޫ ފޭދޫގައި 76 ހެކްޓަރު، އައްޑޫ ޑީޓިއުރ ލިންކުގެ އެންބޭންކްމަންޓަށް ބޭނުންވާ 3.3 ހެކްޓަރ އަދި ފަތުރުވެރިކަމަށް ޚާއްސަކޮށްގެން 8.3 ހެކްޓަރ ގެ 3 ރަށެއް ވަނީ ހިއްކާފައެވެ.
މީގެއިތުރުން ހިއްކާފައިވާ ސަރަހައްދުތަކުގެ ގޮނޑުދޮށް ހިމާޔަތްކުރުމުގެ ގޮތުން ހިތަދޫ، މަރަދޫ، މަރަދޫ ފޭދޫ އަދި 4 ލޭން ޑީޓުއަރ ލިންކު ރޯޑް ހިމެނޭ ސަރަަހައްދުގައި ޖުމްލަ 7 ކިލޯމީޓަރުގެ ބޮޑު ހިލަ ވަނީ ޖަައްސާފައެވެ. އަދި ފަތުރުވެރިކަމަށް ޚާއްސަކުރެވިގެން ހިއްކާފައިވާ 3 ރަށުގެ ގޮނޑުދޮށް ހިމާޔަތްކުރުމުގެ ގޮތުން ޖުމްލަ 4.1 ކިލޯމީޓަރުގެ ޖިއޯޓިކް ތޮށިލުމުގެ މަސައްކަތް ވަނީ ނިންމާފައެވެ. މިމަޝްރޫޢުގެ ދަށުން ހިތަދޫ ޒޯން 2 ގައި ތަރައްގީކުރެވިފައިވާ ބީޗަކީ މިހާތަނަށް ރައްޖޭގައި ތަރައްގީކުރެވުނު އެންމެ ދިގު އަރޓިފިޝިއަލް ބީޗެވެ.
ހަންކެޑެ ބްރިޖަކީ 1.463 ކިލޯމީޓަރުގެ މަގެކެވެ. އިންޑިއަން އެގްޒިމް ލައިން އޮފް ކްރެޑިޓް ފެސިލިޓީގެ ދަށުން ހިންގި އެ ދެ މަޝްރޫއަށް 80 މިލިއަން ޑޮލަރު ހަރަދުކޮށްފައިވެއެވެ. މިއީ 1.2 ބިލިއަން ރުފިޔާއެވެ.
