ހަނިމާދޫ ޒުވާނުންގެ ޖަމްޢިއްޔާއިން މި މެޗު ކާމިޔާބު ކުރީ ފަހު ވަގުތު ޖެހި ދެ ލަނޑާއިއެކު 2-0 ގެ ނަތީޖާއަކުންނެވެ. ފޯރިގަދަ މި މެޗުގައި ދެ ޓީމުންވެސް ވަނީ ފެންވަރު ރަނގަޅު ކުޅުމެއް ދައްކާފައެވެ.
މެޗުގެ ފުރަތަމަ ހާފުގައި ލަނޑެއް ނުޖެހުނު ނަމަވެސް، ދެ ޓީމަށްވެސް ލަނޑު ޖެހުމުގެ ރަނގަޅު ފުރުސަތުތަކެއް ލިބުނެވެ. ޚާއްސަކޮށް ހަނިމާދޫއަށް ލިބުނު ގިނަ ފުރުޞަތުތަކުގެ ބޭނުން ނުކުރެވި ހާފު ނިމިގެން ދިޔައީއެވެ.
މެޗުގެ 85 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ނާއިލް ޔޫސުފް ވަނީ ފުރަތަމަ ލަނޑު ކާމިޔާބުކޮށްފައެވެ. އަދި މެޗުގެ ފުރިހަމަ ވަގުތު ހަމަވުމަށްފަހު ދެއްކި އިތުރު ވަގުތުގައި ހަނިމާދޫގެ ތަޖުރިބާކާރު ކުޅުންތެރިޔާ މުޙައްމަދު ޙަސަން ވަނީ ދެވަނަ ލަނޑު ޖަހައިދީފައެވެ.
މި މޮޅާއިއެކު ހަނިމާދޫ ޒުވާނުންގެ ޖަމްޢިއްޔާއަށް ވަނީ މުބާރާތުގެ ސެމީފައިނަލްގެ ޖާގައެއް ކަށަވަރުވެފައެވެ. އެހެންނަމަވެސް، ތިލަދުންމަތީގެ ޓީމަށް މި މެޗުން ބަލިވުމާއެކު ސެމީފައިނަލަށް ދިއުމުގެ ފުރުޞަތު ވަނީ ހަނިވެފައެވެ. އެ ޓީމަށް ސެމީފައިނަލްގެ ޖާގައެއް ކަށަވަރުވާނީ ދެން ކުޅޭ މެޗުން މޮޅުވެ، ގްރޫޕްގެ ހުރިހާ މެޗުތަކެއް ނިމުމުންނެވެ.
ހަނިމާދޫ ޒުވާނުންގެ ޖަމްޢިއްޔާގެ ދެން އޮތް މެޗަކީ މި މަހުގެ 16 ވަނަ ދުވަހު ޒިގްޒެގް ފޯ ޔޫތް ލިންކޭޖާ ދެކޮޅަށް ކުޅޭ މެޗެވެ. މި މެޗަކީ ގްރޫޕް ބީގެ އެއްވަނަ ކަނޑައަޅާ މެޗެވެ.
