ގޮށްކޮޅާއި ހަނިމާދޫ ސްކޫލު ގުޅިގެން މީޑިއާ ކައުންސިލުގެ އެހީތެރިކަމާއިއެކު ސްޓޫޑެންޓް ޖާނަލިޒަމް ޕްރޮގްރާމެއް ހަނިމާދޫ ސްކޫލުގެ ދަރިވަރުންނަށް އަމާޒުކޮށް ހިންގައިފިއެވެ. މި ޕްރޮގްރާމް ކުރިއަށް ގެންގޮސްފައިވަނީ މިމަހު 15 ން 17 ވަނަދުވަހަށް ހަނިމާދޫ އިޖްތިމާއީ މަރުކަޒުގައެވެ.
މި ޕްރޮގްރާމްގައި ހަނިމާދޫ ސްކޫލްގެ 28 ދަރިވަރަކު ބައިވެރިވެފައިވެއެވެ. އެ ދަރިވަރުނަށް ވަނީ ނޫސްވެރިކަމާއި، ޚަބަރު ލިޔުމާއި އަދި ނޫސްވެރިން އަމަލުކުރަންޖެހޭ އަޚްލާޤީ މިންގަނޑުތަކަށް އަހުލުވެރި ކުރުވާފައިވެއެވެ.
އަދި އިންޓަވިއު ކުރުމުގެ ހުނަރާއި ފޮޓޯ ނޫސްވެރިކަން އަދި ވީޑިއޯ ނޫސްވެރިކަމުގެ މަޢުލޫމާތު ވަނީ ފޯރުކޮށްދީފައެވެ.
މީގެ އިތުރުން އެދަރިވަރުން ވަނީ މިޕްރޮގުރާމުގައި ކިޔަވައިދިން ތަކެތި އަމަލީ މައިދާނުގައި ބޭނުން ކޮށް ފަސް ގުރޫޕަކަށް ބަހައިލައި ރަށުގެ ފަސް އިދާރާއެއްގެ ވެރިންނާއި އިންޓަވިިއުކޮށް، ވީޑިއޯ ތައްޔާރުކޮށް ހަބަރުވެސް އުފައްދާފައެވެ.
މި ޕްރޮގްރާމްގެ ނިންމުމުގެ ހަފްލާގައި ދަރިވަރުންގެ މަސައްކަތް ބެލެނިވެެރީންނަށް ވަނީ ދައްކާލާފައެވެ.
