ހަނިމާދޫ އިންޓަނޭޝަނަލް އެއަރޕޯޓް ނިމުމުގެ ކުރިން ޓޫރިޒަމަށް ބިންތައް ދޫކުރާނެ ކަމަށް ހަނިމާދޫ ކައުންސިލްގެ ނައިބު ރައީސް ފިރާޤް މުޙައްމަދު ވިދާޅުވެއްޖެއެވެ.
ސްޓޫޑެންޓް ޖާނަލިޒަމް ޕްރޮގްރާމްގެ ދަރިވަރުންނަށް ދެއްވި އިންޓަވިއުއެއްގައި ފިރާގު ވިދާޅުވީ ހަނިމާދޫގެ ލޭ ނާރަކި ޓޫރިޒަމް ކަމަށާއި ރަށުގެ ތަނަވަސްކަން މި އޮތީވެސް ޓޫރިޒަމްގެ ސަބަބުން ކަމަށެވެ.
ފިރާގު ވިދާޅުވިގޮތުގައި މިހާރު ހަނިމާދޫގައި ޓޫރިޒަމް ހޮޓަލެއްގެ ގޮތުގައި ހުރީ ބެއަރފުޓް އެކޯ ހޮޓެލް އެކަނި ކަމަށާއި ބެއަރފުޓުން އެކަނިވެސް މުޅި ހަނިމާދޫ ހިފަހައްޓަމުން އަންނަ ކަމަށެވެ. ބެއަރފުޓް ފަދަ އެހެން ބެއަރފުޓްތަކެއް އައުމަކީ ވަރަށް ބޮޑު ކުރިއެރުމަަކަށް ވާނެ ކަމަށްވެސް ފިރާޤް ވިދާޅުވިއެވެ.
ރަށުގައި ޓޫރިޒަމް ފުޅާކުރުމަށް ކުރަމުން އަންނަ މަސައްކަތްތައް ފާހަގަކުރައްވައި ފިރާގު ވިދާޅުވީ އިތުރު ގެސްޓްހައުސްތައް ހެދުމަށް މިހާރު 14 ބިމެއް ދޫކޮށްފައިވާ ކަމަށެވެ. އޭގެ ތެރޭގައި ހިމެނެނީ 10،000 އަކަފޫޓުގެ ހަތަރު ބިމާއި 5000 އަކަފޫޓުގެ 10 ބިންކަމަށެވެ. އަދި އެބިންތައް މިހާރު ވަނީ އެގްރިމެންޓް ކުރާ ހިސާބުގައި ކަމަށެވެ.
އެޑިޓޯރިއަލްގެ ބަސް: މިއީ ގޮށްކޮޅު އަދި މީޑިއާ ކައުންސިލު ގުޅިގެން، ހަނިމާދޫ ސްކޫލުގެ ދަރިވަރުންނަށް އަމާޒުކޮށް މި މަހުގެ 15 އިން 17 އަށް ކުރިއަށްގެންދިއަ “ސްޓޫޑެންޓް ޖާނަލިޒަމް ޕްރޮގްރާމް” ގެ ބައިވެރިންގެ ފައިނަލް އެސައިންމަންޓަށް ތައްޔާރުކޮށްފައިވާ ލިޔުމެކެވެ. މި ލިޔުން އަސާސްކޮށްފައިވަނީ ހަނިމާދޫ ކައުންސިލުގެ ނައިބު ރައީސް، ފިރާޤު މުޙައްމަދު ދެއްވި އިންޓަވިއުގައި ހިއްސާކުރެއްވި މަޢުލޫމާތުގެ މައްޗަށެވެ.
