ދަރަވަންދޫ ކައުންސިލަށް ލިބުނު މައުލޫމާތަކާއި ގުޅިގެން ފެންޕުލާންޓަށް ގޮސް ބެލިއިރު ބޭނުން ކުރަން ކަނޑާފައި ހުރި ހަމަކީވެސް މުއްދަތު ހަމެވެފައިވާ ކްލޮރިން ހަންކަން ވަނީ ފާހަގަ ވެފައި ކަމަށާއި އަދި މުއްދަތު ހަމަވެފައިވާ ހަންތަކު ތެރޭގައި 2023 ވަނަ އަހަރު ފެބުރުވަރީ މަހަށް މުއްދަތު ހަމަވެފައިވާ ހަން ހުރިކަމަށް ދަރަވަންދޫ ކައުންސިލުން މިރޭ ނެރުނު ބަޔާނެއްގައިވެއެވެ. އަދި އެތަނުގައި މުއްދަތު ހަމަނުވާ 2 ހަން ހުރިކަމަށްވެސް ވެއެވެ. އެ ދެ ހަން ހުރީ ނުވެސް ކަނޑާ ކަމަށްވެއެވެ.
އާންމު ސިއްހަތާއި ގުޅުން ހުރި މިފަދަ ހައްސާސީ މައްސަލައެއްގައި ކައުންސިލުން ކަންބޮޑުވުން ފާޅުކުރުމުން އެއީ ދޮގެއްކަމަށް ބުނެ، އެރަށު ފެނަކައިން ވަނީ ލިޔުމެއްނެރެފައެވެ.
ނަމަވެސް މި ވަގުތު ދަރަވަންދޫ ފެނަކަ ބްރާންޗުގެ ހިންގުމާއި ހަވާލުވެ ހުންނެވި މުޙައްމަދު ފަތުހީ ވަނީ މިއަދު ކައުންސިލުން ބޭއްވި ކުއްލި ބައްދަލުވުމުގައި މިހާރު ދަރަވަންދޫ ރައްޔިތުންނަށް ދޫކޮށްފައިވާ ފެނަކީ މުއްދަތު ހަމަވެފައިވާ ކުލޮރިން ބޭނުންކޮށްގެން އުފައްދާފައިވާ ފެން ކަމަށް އެއްބަސް ވެފައެވެ.
އޭނާ އެމައްސަލަ ފެނަކަ ހެޑު އޮފީހަށް ލިޔުނުކަމަށާއި އެއާއިއެކު މިހާރު ހުރި ކްލޮރިން ބޭނުން ކުރުމަށާއި އަންނަ ހަފުތާ ތެރޭ މުއްދަތު ހަމަނުވާ ކުލޮރިން ފޮނުވާނެކަމަށް ފެނަކައިން ބުނިކަމަށް އޭނާ ބުނެފައިވެއެވެ.
ދަރަވަންދޫ ކައުންސިލުން ބުނީ މިކަމުގައި އިތުރަށް ކުރަންޖެހޭ ކަންތައް ކަމާއިގުޅުން ހުރި އިދާރަތަކާއި ގުޅިގެން ކުރަމުން ދާނެކަމަށާއި ރައްޔިތުންގެ ރައްކާތެރިކަމަށް ކުރަން ޖެހުނު ކޮންމެ ކަމެއް ކުރާނެކަމަށެވެ.
