މާފަންނު ގެއެއްގެ ތެރޭގައި އަންހެނެއްގެ ކަރުގައި ވަޅި ޖައްސައި ބިރު ދައްކައިގެން ފުލުހުންނަށް ފިލަން އުޅުން މީހާ ހައްޔަރު ކޮށްފި އެވެ.
ސޯޝަލް މީޑިއާގައި ދައުރުވަމުން އަންނަ ވީޑިއޯތަކުން ފެންނަގޮތުގައި ގެއެއްގެ ތެރޭގައި ފިރިހެނެއް، އަންހެނަކު ހިފަހައްޓައި އޭނާގެ ކަރާ ދިމާލުން އަތް އަޅައި ވަޅިއެއް ކަހަލަ އެއްޗެއް ހިފައިގެން އެ އަންހެންމީހާ ރަހީނުކޮށްފައިވާ މަންޒަރު ފެނެ އެވެ.
އިތުރު ވީޑިއޯއަކުން ފެންނަނީ އެ ފިރިހެން މީހާ، އަންހެން މީހާ ގަދަކަމުން ސައިކަލަކަށް އަރުވައިގެން ގެންދާ މަންޒަރެވެ. އެ ސައިކަލު ހުއްޓުވަން ގިނަ އަދަދެއްގެ ފުލުހުން އެ މަގުގައި ހަރަކާތްތެރިވާ މަންޒަރު ފެންނައިރު، ދެ ފުލުހަކު ސައިކަލަކަށް އެރުމުން އެ ސައިކަލުން ފައިބަން އެ މީހާ ފުލުހުންނަށް އަންގަ އެވެ. އެއަށްފަހު އެ ފިރިހެން މީހާ، އަންހެން މީހާ ސައިކަލު ދުއްވަން އަރުވައި، ސައިކަލުގައި ދާ މަންޒަރު ފެނެއެވެ.
ވަކި ހިސާބަކުން ސައިކަލު މަޑުކޮށްފައި ހުއްޓާ ފުލުހުން އޭނާގެ ފަހަތުން ކުއްލިއަކަށް މުގުރުން ހަމަލާދީ، އޭނާ ވައްޓައިލާތަން ފެނިގެންދެއެވެ. އެއަށްފަހު ގިނަ އަދަދެއްގެ ފުލުހުންނާއި އާންމުން ގުޅިގެން އަންހެން މީހާ ސަލާމަތްކޮށް، އެފިރިހެން މީހާ ވަނީ ހައްޔަރު ކޮށް ފުލުހުންގެ ބެލުމުގެ ދަށަށް ގެންގޮސްފަ އެވެ.
ފުލުހުންގެ އިދާރާއިން ވިދާޅުވީ، އަންހެމީހާ ރަހީނުކޮށްގެން އުޅުނު ފިރިހެންމީހާގެ، އަތްދަށުން އަންހެންމީހާ ސަލާމަތް ކުރަން ބާރުގެ ބޭނުން ކުރުމުން އެމީހާއަށް އަނިޔާވެފައިވާތީ، އޭޑިކޭ ހޮސްޕިޓަލަށް އެމީހާ ގެންގޮސްފަރުވާދެމުންދާ ކަމަށެވެ.
ފުލުހުންގެ އިދާރާއިން ވިދާޅުވީ، ގެ އެއްގެ ތެރޭގައި އަންހެނަކު ބަންދުކޮށްގެން ގެންގުޅޭކަމަށް ފުލުހުންނަށް ލިބުނު މައުލޫމާތަކާއި ގުޅިގެން، ފުލުހުން އެގެއަށް ދިޔުމުން، ފުލުހުން އަންހެން މީހާ ސަލާމަތް ކުރަން އުޅެފިނަމަ ވަޅިހަރައި މަރާލާނެ ކަމަށް ބުނެ، އަންހެންމީހާގެ ކަރުގައި ވަޅި ޖައްސައި ހިފަހައްޓައިގެން އޭނާ އަންހެންމީހާ ގެންގުޅުނު ކަމަށެވެ. އަދި އަންހެންމީހާ މަގުމައްޗަށް ނެރުމަށްފަހުވެސް އަނިޔާކޮށްފައިވާ ކަމަށާއި، އޭގެ ފަހުން އަންހެންމީހާ ގޭތެރެއަށް ވެއްދުމަށްފަހުވެސް އަނިޔާކޮށްފައިވާ ކަމަށެވެ. އަދި އަންހެންމީހާގެ ކަރުގައި ވަޅިޖައްސައި ބިރުދައްކައިގެން ސައިކަލެއްގައި އެސަރަހައްދުން ފިލައިގެންދާން އޭނާ މަސައްކަތްކޮށްފައިވެއެވެ.
ފުލުހުން އިތުރަށް ބުނެފައިވަނީ ފުލުހުން ބާރުގެ ބޭނުންކުރުމުން ފިރިހެން މީހާއަށް އަނިޔާވެފައިވާތީ އޭޑީކޭގައި ފަރުވާދެމުން އަންނަ ކަމަށާއި އަދި ބަންދުކޮށްފައިހުރި އަންހެން މީހާއަށް އައިޖީއެމް ހޮސްޕިޓަލުގައި ފަރުވާދެމުން އަންނަ ކަމަށްވެސް ފުލުހުން ބުނެފައިވެއެވެ.
