6 ސެޕްޓެމްބަރ 2024 ވީ ހުކުރުދުވަހު މެންދުރުފަހު ހަނިމާދޫ ސްކޫލަށް އެޑިއުކޭޝަން މިނިސްޓްރީގެ ޕާރމަނަންޓް ސެކްރެޓަރީ ޝިފާޒް މުޙައްމަދު ޒިޔާރަތް ކުރައްވައިފިއެވެ. މި ޒިޔާރަތް ކުރެއްވުމުގައި ސްކޫލްގެ ޕްރިންސިޕަލް އާއި، އަދި ސްކޫލްގެ ލީޑިންގ ޓީޗަރުންނާއި ބައްދަލުކުރެއްވިއެވެ. އަދި މީގެ އިތުރުން ނޫތަރި ކޮލަމްގެ 3 ޖާނަލިސްޓުންނާއިވެސް މި ބޭފުޅުން ބައްދަލު ކުރެއްވިއެވެ. މިބައްދަލުކުރެއްވުމުގައި ޕީ އެސް ޝިފާޒް މުޙައްމަދު އާއި ރާއްޖޭގެ ތަޢުލީމީ ނިޒާމާއި ބެހޭގޮތުން ތަފާތު 3 ސުވާލެއް ކުރިއެވެ.
އަޅުގަނޑު ހުށަހެޅި ސުވާލު ކަމުގައިވާ ” ޓީޗިންގ އަށް ޝައުޤުވެރިވާ ދަރިވަރުންނަށް ހުރި ފުރުޞަތު ތަކަކީ ކޮބައިތޯ؟ ” މި ސުވާލުގެ ޖަވާބުގައި ޝިފާޒް ވިދާޅުވީ ” ރާއްޖޭގައި އޮންނަނީ ފްރީ ތަޢުލީމީ ނިޒާމެއް ކަމަށާ، ހުރިހާ ސްކޫލް ތަކަކީވެސް އިންޓަރނޭޝަނަލް ސްކޫލެއްގެ ގޮތުގައި އޮންނަނީވެސް ހަމައެކަނި ދިވެހިރާއްޖޭގައި ކަމަށް ޝިފާޒް ވިދާޅުވިއެވެ. އޯ ލެވެލް ނިންމާފަ އޭ ލެވެލް ހަދާ ދަރިވަރުން ޓީޗަރުންނަށް ވާން ބޭނުންވާނަމަ އެކުދިން ސްކޫލްގައި އެ ހޭދަކުރާ 2 އަހަރު ތެރޭގައި ކޮންމެ މަހަކު ޕޮކެޓްމަނީ ގެ ގޮތުގައި -/1500 ރުފިޔާ ލިބިގެން ދެއެވެ.
އެބޭފުޅާގެ ވާހަކަފުޅުގައި ރާއްޖޭގައި ވޮކޭޝަނަލް ޓީޗަރުންނާއި، ބީޓެކް ޓީޗަރުން މަދުކަންވެސް ފާހަގަ ކުރެއްވިއެވެ.
މިރާއްޖޭގެ ޓީޗަރަކު ކޮންމެތަނަކަށް ދިޔަސް އެތަނަކުން ވަޒީފާއެއް ނުލިބި ހުންނާކަށް ނުޖެހޭނެ ކަމަށާއި، ޓީޗަރަކު އެހެން ދާއިރާއަކަށް ކުރިމަތިލި ކަމުގައި ވިޔަސް އެމީހަކަށް ވަޒީފާ ލިބުމުގެ ފުރުޞަތު ބޮޑުކަމަށް ފާހަގަކުރެއްވިއެވެ.
ރައްޔިތުންގެ މަޖްލިސް ކަމުގައި ވިޔަސް، މިނިސްޓަރ ލެވެލް އަށް ބަލާލިކަމުގައި ވިޔަސް ، އަދި ދައުލަތުގެ އެހެން ދާއިރާ އަކަށް ބަލާލިކަމުގައިވިޔަސް ޓީޗަރުކަން ، ލީޑިންގ ޓީޗަރުކަން ، ޕްރިންސިޕަލް ކަން ކުރައްވާފައި ތިއްބެވި ބޭފުޅުން ފުދޭވަރަކަށް ގިނަކަންވެސް ފާހަގަ ކުރެއްވިއެވެ.
ރާއްޖޭގައި ވަރަށް ކުރިންސުރެވެސް ވަނީ ޓީޗަރުން ތަމްރީނުކުރަން ފަށާފައިކަމަށާއި ނަމަވެސް މިހާރު އާދަޔާ ޚިލާފަށް ޓީޗަރުން މަދުކަންވެސް ފާހަގަ ކުރެއްވިއެވެ.
ޤައުމު ބިނާކުރުމަށްޓަކައި އަލަށް ކިޔަވައިގެން ނިކުންނަ ކުދިން ޓީޗަރުންގެ ގޮތުގައި ތިބެ މީހުން ބިނާކުރުމުގެ މަސްއޫލިއްޔަތު އަދާކުރުމުގެ މުހިންމު ކަމުގެ މައްޗަށްވެސް އަލި އަޅުއްވާލެއްވިއެވެ.
އެބޭފުޅެއްގެ އަމިއްލަ ރަށުގައި ހުންނަވައިގެންވެސް 17 ހާހާއި 18 ހާސް ރުފިޔާގެ އާމްދަނީ ޓީޗަރުންނަށް ލިބޭނެކަމަށާއި، ޓީޗަރުކަން ކޮށްގެން މީހާ ބާކީއެއް ނުވާނެކަމުގައިވެސް ވިދާޅުވިއެވެ.
