ހަނިމާދޫގެ ތިން ކުލަބް ޖަމުޢިއްޔާއިން އަތޮޅު ފެންވަރުގައި ރަށް ތަމްސީލުކުރުމަށްޓަކައި ބޮޑެތި އަދަދުތަކެއްގެ މާލީ އެހީތެރިކަން ފޯރުކޮށްދިނުމަށް ހަނިމާދޫ ކައުންސިލުން މިއަދު ނިންމައިފިއެވެ.
މި ނިންމުން ނިންމާފައިވަނީ ކައުންސިލްގެ 150 ވަނަ އާންމު ބައްދަލުވުމުގައި، ޖަލްސާއަށް ހާޒިރުވި މެންބަރުންގެ އިއްތިފާޤުންނެވެ.
މިގޮތުން، ހަނިމާދޫ ޒުވާނުންގެ ޖަމުޢިއްޔާއަށް 70،000 ރުފިޔާ، ކެތިއަރާއަށް 120،800 ރުފިޔާ، އަދި ސާއްބަ އެކުވެރި ކުލަބަށް 141،500 ރުފިޔާ ދިނުމަށް ވަނީ ނިންމާފައެވެ.
މި ފައިސާ ޚަރަދުކުރާނީ ކައުންސިލްގެ ކުޅިވަރު ބަޖެޓުން ކޮންމެ ޖަމުޢިއްޔާއަކަށް 82،000 ރުފިޔާ ދިނުމަށްފަހު، ބާކީ ފައިސާ ކުލަބް ޖަމުޢިއްޔާތަކަށް ދިނުމަށް ކަނޑައަޅާފައިވާ 100،000 ރުފިޔާގެ ބަޖެޓުންނެވެ.
ހަނިމާދޫ ކައުންސިލް ބަޖެޓުން 82،000 ހަނިމާދޫ ޒުވާނުންގެ ޖަމިއްޔާއަށް
މިކަމާއި ގުޅޭގޮތުން ހަނިމާދޫ ކައުންސިލުގެ ނައިބުރައީސް ފިރާޤް މުޙައްމަދު ވިދާޅުވީ، “ކުލަބް ޖަމުޢިއްޔާތަކަށް ހިލޭ އެހީގެ ގޮތުގައި ފައިސާ ޚަރަދުކުރާއިރު ހަމަހަމަ އުސޫލުން ޚަރަދުކުރުމަށް ކަމާއިގުޅޭ އިދާރާތަކުން ލަފާ އަރުވާފައިވާތީ، ކުރީގެ ޖަލްސާގައި ނިންމި ނިންމުން ބަދަލުކޮށް، އިންސާފުވެރި ގޮތަކަށް އަލުން މި ފާސްކުރަން ހުށަހެޅީ” ކަމަށެވެ.
