ހުވަފެންފުށި ރިސޯޓު ކައިރީ އޮންނަ ފިނޮޅަކަށް ދަތުރުގޮސް އުޅެނިކޮށް ގެއްލުނު މ. އަސަރީހަނދާން، ތަސްލީމް މުޙައްމަދު (43އ) ހޯދުމަށް އިންޓަޕޯލްގެ އެހީތެރިކަމަށް އެދިފައިވާކަމަށް ފުލުުހުން ބުނެފިއެވެ.
ފުލުހުން ނެރުނު ބަޔާނެއްގައި ބުނީ، ތަސްލީމް ހޯދުމަށް ފުލުހުންނާއި، އެމްއެންޑީއެފްގެ ޑައިވް ޓީމްތަކުން ފަސްގަނޑު ހިމެނޭ މޫދު ސަރަހަށްދު ހިމެނޭހެން، ތިން ދުވަހުގެ ތެރޭގައި ޖުމްލަ 943،998 އަކަމީޓަރުގެ ސަރަހައްދެއް ޑައިވްކޮށްގެން ބަލާފައިވާކަމަށެވެ.
ފުލުހުން ބުނީ، މި މައްސަލާގައި ތަހުގީގަށް ލިބިފައިވާ މައުލޫމާތުތަކުން އެނގޭގޮތުގައި، ހުވަފެންފުށި ކައިރީގައި އޮތް ފަސްގަނޑަށް ދިޔުމަށް އެ ދަތުރުގެ ބައިވެރިން ފުރާފައިވަނީ އޮގަސްޓު 29 ވަނަ ދުވަހުގެ 17:00 އާއި 17:30 އާ ދޭތެރޭގެ ވަގުތެއްގައި މާލޭގެ ދެކުނު ފަރާތު ބަނދަރުންކަމަށެވެ. މި ދަތުރު ގޮސްފައިވަނީ ތަސްލީމް ހިމެނޭހެން ޖުމްލަ 25 މީހުންނާއި ދެ ކުޑަކުދިންކަމަށް ފުލުހުން ބުނެއެވެ. މި ދަތުރަކީ، ބައިވެރިންގެ ތެރެއިން މީހެއްގެ އުފަންދުވަސް ފާހަގަކުރުމަށާއި، އެންގޭޖްމެންޓް ޕާޓީއެއް ބޭއްވުމުގެ ބޭނުމުގައި ގޮސްފައިވާ ދަތުރެއްކަން އެނގިފައިވާކަމަށާއި، މި ދަތުރުގައި ތަސްލީމް ބައިވެރިވެފައިވަނީ، ދަތުރު ރޭވި މީހުންގެ ރަހުމަތްތެރިކަމުގައި ޕާޓީއަށް ތައްޔާރުކުރާ ބެކްޑްރޮޕް އަދި ލައިޓިންގެ ކަރަންޓުގެ މަސައްކަތް ކުރުމަށްކަން ތަހުގީގަށް މައުލޫމާތު ލިބިފައިވާކަމަށް ފުލުހުން ބުނެއެވެ.
ފުލުހުން ބުނީ، އޮގަސްޓު 30 ވަނަ ދުވަހުގެ ހެނދުނު ވަގުތުތަކުގައިވެސް ތަސްލީމް ދަތުރުގެ ބައިވެރިންނާއެކު ހަރަކާތްތެރިވާ މަންޒަރު ހިމެނޭ ފޮޓޯއާއި ވީޑިއޯ ތަހުގީގަށް ލިބިފައިވާކަމަށެވެ. އެ ފަސްގަނޑުގައި ތަސްލީމް ހުއްޓާ އެންމެ ފަހުން ފެނިފައިވަނީ 30 ވަނަ ދުވަހުގެ ހެނދުނު 07:45 އާއި 09:00 އާ ދޭތެރޭގައިކަން ތަހުގީގަށް ލިބިފައިވާ މައުލޫމާތުން އެނގޭކަމަށް ފުލުހުން ބުނެފައިވެއެވެ.
ފުލުހުން ބުނީ، ތަސްލީމް މާލޭ ދާން ބުނެފައިވުމުން، އެދުވަހުގެ 10:00 އާއި 11:00 އާ ދޭތެރޭ މާލެ ފުރި ލޯންޗުގައި އޭނަ މާލެ ފޮނުވާލުމަށް ދަތުރުގެ ބައިވެރިން އޭނަ ހޯދުމުން ފެނިފައިނުވާތީ، އޭނަ އެހެން ލޯންޗެއްގައި މާލެ ގޮސްފައިވޭތޯ ބެލުމަށް ދަތުރުގެ ބައިވެރިން ތަސްލީމްގެ އާއިލާއަށް ގުޅައި މައުލޫމާތު ސާފުކޮށްފައިވާކަމަށެވެ. އަދި ތަސްލީމް މާލެ ނާންނަކަމަށް އާއިލާއިން މައުލޫމާތު ދިނުމުން އޭނަ ހޯދުމުގެ މަސައްކަތް ދަތުރުގެ ބައިވެރިން ފެށިކަންވެސް ތަހުގީގަށް އެނގިފައިވާކަމަށް ބުނެފައިވެއެވެ.
ފުލުހުން ބުނީ، މި މައްސަލައާއި ގުޅިގެން ތަހުގީގުގައި، ތަސްލީމާއި އެކު ދަތުރުުދިޔަ މީހުންނާއި ސުވާލުކުރުމުގެ އިތުރުން އެފަސްގަނޑަށް ދަތުރު ދިޔަ އިތުރު ގުރޫޕެއްގައި ހިމެނޭ 12 މީހުންނާވެސް ތަހުގީގުގައި ސުވާލުކޮށްފައިވާކަމަށެވެ. އަދި މަސްލީމް ބޭނުންކުރާ ފޯނާއި ލެޕްޓޮޕް ފޮރެންސިކް ތަހުލީލުކުރުމުގެ މަސައްކަތް ފަށައި، ތަސްލީމާއި އިތުރު ބަޔަކު ދަތުރު ދިޔުމަށް ބޭނުންކުރި ދެ ލޯންޗް ބަލައި ފާސްކޮށްފައިވާކަމަށެވެ.
މީގެއިތުރުން ތަސްލީމް މާލޭގައި އާންމުކޮށް ގޮސްއުޅޭ ސަރަހަށްދުތައްވެސް ބަލައިފާސްކޮށްފައިވާކަމަށް ފުލުުހުން ބުނެއެވެ. އަދި، ތަސްލީމް ހޯދުމަށްޓަކައި އިންޓަޕޯލް ޔެލޯ ނޯޓިސްއަށް އެދިފައިވާކަމަށް ފުލުހުން މައުލޫމަތު ދެއެވެ.
މި މައްސަަލަ ފުލުހުން ތަހުގީގުކުރަމުންދާއިރު، މި މައްސަލައާއި ގުޅޭގޮތުން ތަސްލީމްގެ އާއިލާއާއި ބައްދަލުކޮށް މައުލޫމަތު ސާފުކޮށް، މައްސަލައިގެ ތަހުގީގު ކުރިޔަށްދާގޮތުގެ މައުލޫމާތުވެސް އާއިލާއާއި ހިއްސާކުރަމުންދާކަމަށް ފުލުހުން ވަނީ ބުނެފައެވެ.
