ފުލުހުން ބުނީ ހެލްތު މިނިސްޓްރީގެ ހުއްދަ ނުހޯދައި ހިޖާމާ ޖެހުމުގެ ހިދުމަތް ހުޅުމާލޭގައި ދެމުންދާ ކްލިނިކެއްގެ މައްސަލަ ބަލައިދިނުމަށް މިނިސްޓްރީން އެދިފައިވާ ކަމަށެވެ. އަދި އެމައްސަލަ މިހާރު ފުލުހުން ތަހުގީގު ކުރަމުން އަންނަ ކަމަށް ފުލުހުން ބުންޏެވެ.
ހެލްތު މިނިސްޓްރީން ބުނީ މި ޚިދުމަތް ހުއްޓާލުމަށް ފަޒީލާ އަށް އަންގާފައިވަނީ މިނިސްޓްރީއަށް ލިބެމުންދާ ޝަކުވާ އަށް ބަލާ އޭނާއާއި ބައްދަލުކޮށް ރަޖިސްޓްރީކޮށްގެން ހިޖާމާގެ ޚިދުމަތް ދިނުމަށް އެންގުމަށް ފަހު ކަމަށެވެ.
” ފަޒީސް ހިޖާމާ ތެރަޕީ” ގެ ނަމުގައި ސޯޝަލް މިޑިއާގައި ޞިއްހީ ޚިދުމަތުގެ ގޮތުގައި ކޮށްފައިވާ އިޝްތިހާރުތަކަކީ ވެސް މިނިސްޓްރީގެ ހުއްދަލިބިގެން މެނުވީ ނުކުރެވޭނެ ކަންކަން ކަމަށްވާތީ އެފަދަ އިޝްތިހާރުތައްވެސް ނެގުމަށް އަންގާފައިވާނެ ކަމަށް މިނިސްޓްރީން ބުނެ އެވެ.
ޞިއްޙީ ފަރުވާއެއް ފޯރުކޮށްދިނުމަށް ބޭނުންވާނަމަ ހަމަޖެހިފައިވާ އުސޫލުގެ ދަށުން ހުށަހަޅައިގެން އެ ޚިދުމަތަށް ރަޖިސްޓްރީކޮށް އޮޕަރޭޓިން ލައިސަންސް ހޯދުމަށްފަހު ނޫނީ ހިޖާމާގެ ޚިދުމަތް ނުދިނުމަށް 2019 ވަނަ އަހަރުވެސް ފަޒީލާ އަށް ހެލްތު މިނިސްޓްރީން ވަނީ އަންގާފަ އެވެ.
އަދި ހަކުރުބައްޔަކީ ހިޖާމާއިން ކޮންޓްރޯލް ކުރެވޭ ބައްޔެއް ކަމަށާއި ބޭސްތަކުގެ ބަދަލުގައި ހިޖާމާ ޖެހުމަށް ބާރު އަޅައި އިޝްތިހާރުތައް ކުރުމުން ޑައިބެޓިކްސް ސޮސައިޓީ ފަދަ ތަންތަނުން ވެސް ވަނީ ނުރުހުން ފާޅުކޮށްފަ އެވެ.
