ޝާޢިރުން ނުވަތަ ޅެންވެރިން ވެސް ޙައިރާންވާހާ ފުރިހަމައަށް ޤުރުއާން ވަނީ އަޅުގަނޑުމެންނާ ހިސާބަށް ﷲސުބުޙާނަހޫ ވަތަޢާލާ ބާވާލައްވަވާފައި ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.
އެ މަނިކުފާނު މިހެން ވިދާޅުވީ ތިލަދުންމަތީ ދެކުނުބުރީ އަތޮޅު ކައުންސިލުން އިންތިޒާމުކޮށްގެން އެ އަތޮޅު ހަނިމާދޫގައި ބޭއްވި ތިލަދެކުނު ޤުރުއާން މުބާރާތް 2024 ނިންމުމުގެ ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަފުޅުގައެވެ.
ކީރިތި ޤުރުއާނާ ބެހޭ ގޮތުން އެ ޖަލްސާގައި އެ މަނިކުފާނު ދެއްކެވި ވާހަކަފުޅުގައި އަޅުގަނޑުމެން މުސްލިމަކަށް ވީތީ އަޅުގަނޑުމެން އެންމެ ދޯޅަ، އަޅުގަނޑުމެން އެންމެ ގާތްވާންޖެހޭ ފޮތަކީ ކީރިތި ޤުރުއާން ކަމަށް ވިދާޅުވިއެވެ.
އަދި މުޅި އިސްލާމީ އުންމަތަށާއި، މި އުންމަތުގެ އެންމެންނަށް އެންމެ ތަޖުރިބާ ހުރި އެންމެ ޢިލްމީ އަދި މިހާތަނަށް ސައެންސްގެ އަލީގައި ވެސް އާ ކަމެއް ނުހޯދޭ، އެ ހުރިހައި ކަމެއް ހިމެނިފައިވާ ފޮތަކީ ވެސް ކީރިތި ޤަުރުއާން ކަމަށް ވިދާޅުވިއެވެ.
ތިލަދެކުނު ޤުރުއާން މުބާރާތް 2024 ނިންމުމުގެ ރަސްމިއްޔާތު ޝަރަފުވެރިކޮށްދެއްވާ ވަޒީރު އާދަމް ޝަރީފު ޢުމަރު ދެއްކެވި ވާހަކަފުޅުގައި، ރީތިކޮށް ޤުއާން ކިޔަވާ އަޑު އެހުމަކީ ވެސް އަޅުގަނޑުމެންގެ ހިތަށް ވަރަށް ބޮޑު ފިނިކަމެއް ލިބިގެންދާ ކަމެއް ކަމަށް ވިދާޅުވިއެވެ. އަދި އެ މަނިކުފާނު ވިދާޅުވީ މި ފަނާވަނިވި ދުނިޔޭގައި ކުރާ ކޮންމެ ތަޖުރިބާއަކާއި، ލިބޭ ކޮންމެ ވޭނަކުން ސަލާމަތްވުމުގެ ހުރިހައި ޝިފާއެއް ލައްވާފައި ވަނީ ކީރިތި ޤުރުއާނުގައި ކަމަށެވެ.
